في رحاب الملحون المغاربي
اهلا وسهلا بكل الزوار يسعدنا تواجدكم معنا في منتدى رحاب الملحون المغاربي

انضم إلى المنتدى ، فالأمر سريع وسهل

في رحاب الملحون المغاربي
اهلا وسهلا بكل الزوار يسعدنا تواجدكم معنا في منتدى رحاب الملحون المغاربي
في رحاب الملحون المغاربي
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.
في رحاب الملحون المغاربي

في رحاب الملحون المغاربي

قصيدة اللسان ــــــ الشيخ البشير التهامي Screen69

أهلا وسهلا بك زائرنا الكريم, أنت لم تقم بتسجيل الدخول بعد! يشرفنا أن تقوم بالدخول أو التسجيل إذا رغبت بالمشاركة في المنتدى

قصيدة اللسان ــــــ الشيخ البشير التهامي

اذهب الى الأسفل  رسالة [صفحة 1 من اصل 1]

في رحاب الملحون المغاربي


عضو نشيط
عضو نشيط

قصيدة اللسان

لْسَانِي يَكْفِي مْنْ الْخْــــطَا * مَا فِيكْ عْظَمْ تَلْتْوَى مَثْلْ الْمَطَّـــاطْ *
في الْفُمْ مَرْعُوشْ غِيرْ تَخْبَطْ * مُولْ النِّيَّة تْغَلّْطُه..
مَثْلْ اللَّفْعَة الْمْزَرْقْطَة * وَ تْنُطْ بْلَا رْجَلْ كَالشُّطْرُبْ خَبَّــاطْ *
تَلْدَغْ مْنْ الْقْفَى وْ تَكْشُطْ * وَ تْهَتَّكْ مَنْ تْصَوّْطُه..
ثَرْثَارْ وْ بِيرْ لَا غْطَا * مَا قَادَرْ كَتْمْ سَرْ مَنْ طَبْعُه فَطْفَاطْ *
بَالْهَدْرَة الزَّايْفَة مْلَقَّطْ * سَامَعْ قُولُه يْوَرْطُه..
مَنْجَلْ حَصَّادْ مَا بْطَا * أوْ مَزَّبْرَة عْجُولْ سَقَّاطْ وْ مَقَّاطْ*
وَ لَا مَنْشَارْ فِ يدْ فَالَطْ * بَعْدْ الضَّرْبَة يْكَشْطُه..
رْيَاحْ الْفَتْنَاتْ سَايْطَة * تْسَبَّبْ فِيهَا اللّْسَانْ مَتْعَنَّتْ شَحْرَاطْ*
قَذْفْ وْ بُهْتَانْ جَا مْشَطَّطْ * وَ السَّامَعْ زَادْ مَغّْطُه..

يَدْوِي وَ النَّاسْ شَايْطَة * ألْحِيلَة حَرْفْتُه مْوَلَّعْ بَالتَّخْلَاطْ *
مَا يَسْهَى يَلْتْهَى مْسَلَّطْ * فِي عَرْضْ النَّاسْ شَرْمْطُه
لَسْنَانْ عْلِيهْ حَايْطَة * وَ زْلَغْ بِيَّا الذّْمِيمْ فِي حَضْرَةْ لَصْبَاطْ *
زَامَقْ لَلْفَاحْشَة مْقَرْنَطْ * وَ الْعَارْ كْبِيرْ بَصّْطُه
بِينْ الْفَكِّينْ مَاشْطَة * حَبَّكْ الْقُولْ شَبّْكُه تَمْثِيلْ الْقَاطْ *
نَاعَمْ لَلسَّمْعْ لِيسْ يَقْنُطْ * يُوقَعْ في الْفَخّْ لَاقْطُه
يْرَجَّعْ الْمَايْلَة وْطَا * وِ يْسَلَّسْهَا تْلِينْ تَسْهَالْ وْ تَهْبَــاطْ *
تَهْوَانْ الصَّاعْبَة وْ تَبْصَطْ * كُلْ التَّشْتَاتْ قَبّْطُه
رْيَاحْ الْفَتْنَاتْ سَايْطَة * تْسَبَّبْ فِيهَا اللّْسَانْ مَتْعَنَّتْ شَحْرَاطْ*
قَذْفْ وْ بُهْتَانْ جَا مْشَطَّطْ * وَ السَّامَعْ زَادْ مَغّْطُه..

تَاخَذْتْ لْجَامْ وَاسْطَة * لَجَّمْتْ الْفُمْ دَرْتْ وَاقِي وَ احْتِيَّـاطْ *
تْخَلَّصْ مَنُّه فْ حِينْ وَ سْقَطْ * وَ زْمَقْ بَالسَّمْ ضَاغْطُه
شْيُوخْ وْ أَدْبَا مْخَلْطَة * وَرَّطْنِي بَالْكْلُوفْ مَا يَنْفَعْ رْبَاطْ *
مَا صَبْتْ حْيَالْ لُو تْحَنَّطْ * يَنْطَقْ حَتَّى وْ صَارْطَه
أُولِي لَلْبَابْ سَاخْطَة * لَا كَلْمَةْ خِيرْ بَاشْ تَعْبُرْ الصِّرَاطْ *
غَضْبْ الْمُولَى عْلِيكْ يَسْخَطْ * شَرَّكْ كَتْفِي مْلَقْطُه
لَا ذَكْرْ سْرِيعْ الْعْطَا * مَا سَبَّحْ للْكْرِيمْ عَلْمُه بِينَا حَاطْ *
اتْلُو ذَكْرْ الْحْكِيمْ بَسَطْ * وَ افْهَمْ فَحْوْ شْرايْطُه
رْيَاحْ الْفَتْنَاتْ سَايْطَة * تْسَبَّبْ فِيهَا اللّْسَانْ مَتْعَنَّتْ شَحْرَاطْ*
قَذْفْ وْ بُهْتَانْ جَا مْشَطَّطْ * وَ السَّامَعْ زَادْ مَغّْطُه..

كُثْرْ التَّسْبِيحْ حِنْطَة * تُوجَدْهَا سَاعْةْ الْخْلَايقْ فِي تَزْلَاطْ *
يَنْشَفْ الرِّيقْ وَاشْ تَصْرُطْ * وَ الْمُولَى مَا تْبَلْعْطُه
مَا كِيفْ التَّقْوَى مْطَـــــا * ألْعِفَّة في الْقْلُوبْ وَ لْسَانِي هَطْهَاطْ*
لُو يَتْرَزَّنْ مَا يْصَمَّطْ * يَفْقَهْ قَوْلُه مْضَبْطُه
حَكْمَةْ الْفِكْرْ قَاسْطَة * لُو يَنْطَقْ الْعْقَلْ يَتْحَدَّى سُقْرَاطْ *
وَ لْسَانْ بْلَا عْقَلْ سَاقَطْ * مَنْ فَكْرْ احْكَامْ يَنْبْطُوا
وَ الْقَلْبْ حْنِينْ مَا خْطَى * يَتْنَغَّمْ اللّْسَانْ بَوْتَرْ فِي تَنْقَاطْ *
رَخَّمْ صُوتُه الطّْيُورْ تَحْبَطْ * بَالتَّسْبِيحَة يْنَشْطُوا
رْيَاحْ الْفَتْنَاتْ سَايْطَة * تْسَبَّبْ فِيهَا اللّْسَانْ مَتْعَنَّتْ شَحْرَاطْ*
قَذْفْ وْ بُهْتَانْ جَا مْشَطَّطْ * وَ السَّامَعْ زَادْ مَغّْطُه..

مَالْ الأمَّة مْفَرْطَة * مَدْحْ الْهَادِي الشّْفِيعْ أجْرُه بَالْقِيرَاطْ *
صَلَّى الله عْلِيهْ وَاسَطْ * يَسْقِي بَالْكَفْ شَاحْطُه
وَالذِّكْرْ يْبعّْدْ الْخْطَا * يَتْجَلَّى نُورْ في الْقْلِيبْ يْزِيدْ نْشَاطْ *
ألسَّمِيعْ الْغْنِي الْبَاسَطْ * خَيْرُه لَلْخَلْقْ بَاسْطُه
لْسُونْ الْبَكْمَا مْرَبْطَا * مَا يَنْطَقْ خِيرْ آوْ شَرْ لَا صَرْخْ عْيَاطْ *
صَابَرْ رَاضِي وْ لِيسْ قَانَطْ * بَالْإِشَارَة تْوَاسْطُه
نَطْرُزْ حَلَّة مْخَيّْطَة * بَشِيرْ الْيُومْ جَابْ تُحْفَة لَا تَلْمَاطْ*
تهَامِي في الدّْجَى يْخَطَّطْ * رَايَسْ الْبَحْرْ مَاشْطُه
بحقايق مستنبطة * أداها بالوفا و حكمة و انضباط *
بونور دوى بنغم ناشط * نجيب هواه ضابطه
ألدُّنْيَا خُلْطْ خَالْطَة * هَذَا نِيَّة وْ ذَاكْ حِيلَة تَحْتْ الْبَاطْ *
لَاخُرْ تَحْتُه كْذَا مْشَاحَطْ * وَ اللِّي عَقْلُه مْزَرْوْطُه
وَاحَدْ نَفْسُه مْشَيْطَة * وَ اللِّي مُولُوعْ بَالْحْفَى لَاشْ الصَّبَّاطْ *
قَلْبْ الْجِيعَانْ لَبْدْ لَاهَطْ * بْرَزْقُه وَ الله صَاخْطُه
لَطْيَارْ الَّا الْمَحَقْطَة * لَا تَقْرُنْ فَرْخْ بَازْ لَلطَّيْرْ الْوَطْوَاطْ *
آشْ يْجِيبْ الْحْمَامْ لَلْبَطْ * وَ الدَّاجَنْ ذَاكْ سَاقْطُه
لُوحُوشْ اصْنَافْ نَاشْطَة * آشْ يْجِيبْ السّْبَعْ لَلْفَرْدْ الزَّعْبَاطْ *
آشْ يْجِيبْ النّْمَرْ لَلْقَطْ * وَ الْجَحْشْ وْلِيفْ مَرْبْطُه
شَطَّحْتْ الْقَفْيَة بْطَا * رَصِّيتْ الْبَنْيْ بَالْوْفَى زَادُه تَمْلَاطْ *
نَلْتْ الْمَسْعَى وْ كُنْتْ غَابَطْ * حَاكَمْ قَدْرِي وْ ضَابْطُه
نَلْتْ الْحِكْمَة بْوَاسْطَة * طَايَعْ لَشْيَاخْ مَا نْحَافِيهُمْ لَسْبَاطْ *
مَسْتْغَانَمْ أُمْ لَلْمْرَابَطْ * أوْلِيَّتْهَا يْحَوْطُوا
رْيَاحْ الْفَتْنَاتْ سَايْطَة * تْسَبَّبْ فِيهَا اللّْسَانْ مَتْعَنَّتْ شَحْرَاطْ*
قَذْفْ وْ بُهْتَانْ جَا مْشَطَّطْ * وَ السَّامَعْ زَادْ مَغّْطُه..

https://almalhon.yoo7.com

الرجوع الى أعلى الصفحة  رسالة [صفحة 1 من اصل 1]

صلاحيات هذا المنتدى:
لاتستطيع الرد على المواضيع في هذا المنتدى