جديد العقاب
الشيخ العاقل بن عامر
كان تختار اليوم يكون ليك عشار
دير جارك شجرة ولا صحور رمدة
كان تدري وسع الجونة يزيد مقدار
والصبر طاڨة بيه نعافرو الكودة
كان تنده للوجبة حافيين لظفار
واش تجني يا قاصد سوڨ فيه خردة
كان تدري ليام ايبكمو الدعار
شايطين اللسنة منها سعاو جلدة
شوف درك المرخس بيها تطول لعمار
والتراريس اتروح في خفى وجحدة
عيف مخزوم النيف وسوڨو بدينار
لوح دينارو ما ينفعش يوم شدة
ماتفيدش بعد الغلطة نجوع لعذار
كان بركت بحمول مذهبة العدة
غير عدونا في بحر الكلام كفار
حين ولى للشعر طريڨ فيه مردة
كابرين معازيز نهار جايب نهار
عاشرين الدنيا بالخير والمودة
دايما بياتة في عاليات لوكار
ما توسدنا زند ذراع لا مخدة
طايرين نحومو بر السهول واوعار
ما يرافڨنا قي من هو قسيح كبدة
ما ظلمنا في الدنيا لا غريب لا جار
نزرعو ونربو وسط الجباح شهدة
ما نفخنا للسوڨ اسوام كي التجار
ما نزيدو مفصل للي ضعيف قلدة
ما نذرو في نادر هايفين لقمار
والتبن لاه عليك تڨول ذاك جودة
والتبن عولة ريح يدير بيه تيار
ما يوالم هيتوم الخيش ليل بلدة
كان جينا للخيل انزيخو المشوار
والركابات سوا فردة تحك فردة
كان جينا للصيد نعدمو الڨهڨار
كان جا داحمنا شاو الطراد وابدى
كان ڨفا عنا راد السلام واختار
ذاك ما ردنا يوم انڨابلو الولدة
كل حاجة شينة تبقى حديث للعار
والزبد ما يلحڨ ڨلب التراب يندى
والڨمر يجبى عالي في شبوب واوقار
ماتهم الظلمة وحدة ڨبال وحدة
