من الذاكرة ......
نبكي حال بلاد من حالك عيّاش....
من حكّام اليوم مادارو فينا
صار الحزن غطى وعاد الهم فراش...
تُهنا في ذا التيه تايه مدّينا
صار الموت رفيق لينا مايعياش...
كلاّ يوم يحوز قطعة ينهينا
البعض كلاه الحوت من زورق طيّاش...
تحت الموجة غاب ماولاّ لينا
والبعض داتو حبوب هلوس مايصحاش...
شفتو يقتل واه أمو لحنينة
وبعض داتو حدود راح وماولاّش....
ملّ حياتو ما البلاد مخلّينا
سلطة جحتو الكل لفراش وماحاش...
مافيكم تراس يڨلع لغبينا
عِصابة بالنهب تدّاول وعلاش...
علي بابا وحار وين الخزينة
قول لولد عباس رانا في لنعاش...
خفنا من السويد تلحق علينا
ڨلو يادكتور يكفينا تنباش...
كذبك بان اليوم ربي يهدينا
رحتو بينا لوين عدنا مانسواش...
حتى الموزمبيق ضحكت علينا
قعدنا عرة كي المعزة وسط كباش...
لامن عنّا يخاف لامن يشتينا
بعتوها لبلاد وخلصتوها كاش...
وقسمتوها ڨاع راهم وسمينة
نعت ذيابة قا الماكر والغشاش...
والثعبان اللي بسمّو يروينا
من سوءالتسيير لامشروع وعاش...
كلّش غي تسڨاد مافيه متينة
كلش راشي من خدعكم مايبقاش...
يتحول ويزول قبلن يتفينا
قتلتونا لكان بالزوخ وتبياش...
شعب العزة والعشا غي ڨرنينة
ارفع راسك يابا ني طيح الشاش ...
حين رفعتو طاح في جعبة بينا
راح مع عياش يارايس ماجاش...
في ماصورة بات من فوقو طينة
تسع يام حفيركم مالقيتوناش...
بالبالة والفاس وخرُد ماشينة
شفنا خوه وبوه دمعة ماتصحاش...
وياداري عن حال أمو مسكينة
نسمع فيها تڨول كبدي مايحياش...
من بردك فالبير واش يدّفينا
تبكيلو بدموع صامت مايلغاش...
عيّاها وحنا عيينا يكفينا
خفنا هاذ الأم عنّا ماترضاش....
تتوسل بدموع لله تدعينا
جرحي من ذا الحال فينا مايبقاش....
من غيرو ذا الحال حال يبّكينا
شفنا هبة جاتهم من كل عراش...
شعب تعاطف كل يسأل وشبينا
الكل يسقسي خوه عن حالك فتّاش...
والله ياعياش لا طاقة فينا
أحمد شتوح....ربي يرحمك عياش.