يا قلبي لا دير لامان
شاعر رشيد رحماني
بسم الله بديتها ساس البنيان
بسم الله بديت فالقول انظم
وصلاة على النبي مول الفرقان
محمد شفيعنا يومن يعظم
وريضة لرفاكتوا دوك السجعان
من كانوا بجوار طه بلقاسم
يا قلبي هولتني مالك حيران
عيت نواعظ فيك وانت متشائم
بسبابك راني مهول في لحزان
كترت هواسي وراني نتالم
ودمعة تجري على خدي ويدان
ما نرقدش الليل ونبات نخمم
تغير حالي والعقل ركبوا تشطان
والضر علية طال منيشي سالم
قوات شغابي والبلا منكل الوان
راه صرالي كي الي واكل السم
زاد تغير خاطـري بالغيض ملان
كتر تشغابي ما بقالي ما نكتم
يا قلبي في سبتك راني غيضان
درت النية فيك وانتايا ظالم
درتك يا قلبي عل الخشبة سلطان
وجوارحي طايعين وانتيا تحكم
وصيتك لا دير فالدنية لامان
ولا تتبعش بليس عدوا بونادم
ونهيتك لا ديرشي فعل الشيطان
داك طريقوا توصلك الجهنم
صفي حالك مالهوا طيع الرحمان
وتبع سيرة النبي زين الخاتم
لا تتبعش النفس ما فيها امان
من يسعفها داك راه الا واهم
يا قلبي بركاك من فعل العصيان
لا تحسد لا تكون فالناس تنمم
استمسك بالدين واطلب الغفران
باب التوبة كاينة للي نادم
وكثر مصلاة النبي حالك يزيان
وقصد بيت الله يرضاك الحاكم
صلي ركعتين قبل الحال يبان
وعمل بالحسنة قبل حالك يتبرم
وتفكر ما قال ربي فالقران
حدث بالمعرف يرضاك دايم
صلاة الخمسة قومها وقت الادان
بالنفيلة راه سعدك يسكم
يوم رحيلك تدي توب كفان
تسكن تحت تراب في بيت مظلم
ما ينفع لا جاه فيه ولا عشران
وكتابك فيديك تلقاه مزمم
هاد الدنية فانية كانك غلطان
سعد الي قام الليل ونهاروا صايم
يا معتاه نهار لمقص والميزان
امام الله كل الخلايق تتحاكم
يشهدوا فيه الجوارح باللي كان
وياخد المظلوم حقوا مالظالم
على صراط يفوت من جاد ابلحسان
امـول السية صعيب حالوا يا فاهم
مول السية داك في سهم النيران
في نار الجحيم مقاموا قايم
ومول الحسنة يكون فنعيم الجنان
في جنة الفردوس فيها يتنعم
رحماني رشيد ناظم دوا لوزان
لشعرا والشيوخ طايع ومسلم