ليام عشقتنا في بوڨرنين
مفلاه في العفى والمعذر
ساعة يصد فينا ساعات ايبين
والشوق في حشانا ينحر
ليام جفياته في ذو لسنين
من ريحنا احضى يتشنكر
حسراه يا اللي كنا مڨرونين
في خالفة ولاه انفسر
ليام ما تخلينا مجمولين
مولى جناح واحد يكسر
بعد العفى اتبلدى كي عاد مهين
ولى معاشر الا مدير
ليام داوية واحنا همادين
ساعة عزيب ساعة تهجر
ليام ما يوالمها عهد متين
ليام كالهوى تتغير
نوبة تجي يسارى نوبات يمين
نوبات شرڨ نوبة تظهر
ليام عايفتنا وحنا زينين
وكحال كل شينة ڨمر
ليام حاسدتنا والسعد ضنين
طول الذراع ولى يڨصر
ليام ڨدمتنا نعت قرابين
للجهل والريا والمظهر
ليام حكمت في الوقت رعاوين
بڨري خويل فينا يشخر
ليام عاشقة قي في الجيعانين
وملات كل ڨاع ايقرقر
ليام ملستنا تملاس الطين
والطين لا ثرى يتثنثر
ليام حتمتنا تسلاف الدين
والدين كان جرى دمر
ما عاطفة ولا حانت بزولين
مبطول واش فيها تعصر
لوكان هي كريمة ماجا مسكين
طول الزمان حاله يدشر
ليام كفنتنا واحنا حيين
والزين وين كان ايقبر
ليام جمعتنا عند الكرعين
واهدات للرخاس المنبر
ليام تعبتني والتعب بنين
من لا شقى يموت مخنزر
ليام ما اتنخسني بين اثنين
بالعز و القناعة نفخر
ليام علمتني هذا الحرفين
ساعة شميت ساعة نشعر
ساعة نجيب كلمة من حال حنين
ساعة نجيبها من مجمر
ليام غير سبة في ذا البيتين
كيما ابغى المولى قدر