شاعرة: سلمى العامرية
ڨال نجيب كلام عنك يا طفلا
حالك عاد شوين زايد تمحاني
حزنك بان كبير فالحرف تجلا
همك دار طريق شببك خيطاني
سريني بالڨول وعدي بالرجلا
سرك بير غميق حجارو صواني
عززني بالڨول والقدر تعلا.....
ڨلت بفالك خير انصت وارجاني
خلي الدمع يسيح تبرا دالعلا
اسمع وأعذر حال مشطن عياني
من صغري مزيون والڨلب محلا
يامن شاف الزين ڨلبو يهواني
عودي غصن ربيع بالورد أدلا
مشمومو فواح هييج عدياني
عصفت بيه ارياح و رعود الڨبلا
مسلم للمكتوب حكمو بكاني
كفي بكف الغيب ظلمني ما خلا
مكيالو مردوف طرطق ميزاني
زرعني وقت مڨيل في وادو نقلا
اسڨاني بالويل يبست عيداني
خدعني بهو الواد نوارو دفلا
بمرارو قصيت لا من داواني
خووض مايا و زاد شلوحني بخلا
لا من سال عليه حالي وحداني
صرت انا ميتوم ڨلبي على غفلا
وفتيلو مبروم لهبت نيراني....
مات الصغر ومات عزك يا طفلا
وقبرتو مفرود لا من عزاني.....
لممد صبرك سل خيطك و مسلا
خييط جرحي و زيد نفذه لكناني
هاذا حرفي ليك زايدني طولا
جردلي لحروف وافهم لمعاني......
..........سلمى.......