.......بقلم شوقي ابن الزيبان........
دڨي بالعينين في صدري رمحك....يمكن يبرد خاطري من ذا لعذاب
مثل اللبة صيديني في وكرك...واهجمي عني بلمخالب وناب
طبع اللبة مايخالف عن طبعك...وانت طبعك ساكنة في وسط الغاب
نستاهل انا الي جيت العندك...نسناهل انا الي دقدقت الباب
نستاهل انا الي ڨلت نحبك....نستاهل انا الي جيتك طلاب
نحسب روحي فالهوى نوقف ڨدك....نحسب روحي كي سبع شاطر عطاب
نحسب حبي قادر عليك يهدك....وتذوبي فيا وتذبلك لهداب
وانت اصلك جارحة واناحدك....مثل غزيل جابتو عندك لسباب
قصدك فارح بالهوى جاك يودك...يمشي رافد فرحتو مادار حساب
ورماتو ليام طايح في وعدك....بعدن فرڨاتو على لهل ولقراب
هاهو جاك ضعيف هازل قاجهدك....واتهناي يافاتكة جاك المكتاب
هاهو ليك ومزڨيه ايلا بدك....والي يبقى خلفي تاكل لكلاب
عارف موتي لازم يكون بيدك....مزين ذيك الخاتمة بيدين احباب
سبة موتي باينة رمية رمڨك....ورموشك رماوني سهم النشاب
كل سهامك صايبتني ياجدك....مافيهمش الي خطا منك وخاب
مكنت وسط دواخلي نظرة عينك....سم سهامك جاي من عينين عڨاب
في الكبدة والڨلب مرشوڨة تهلك....تمحر فالي مابقى ليه التطباب
عينك لدمي شاد الصحرى يفرك....شارد من شاو اللقى حت لعقاب
حتى رمشك بان كي سدى شبك....مثل جريد مسدلة نخلات الزاب
لكحل في عينيك مقساه ويفتك...كيف الي يصيبو غرامك ماينصاب
وآنا صابوني عيونك فالمهلك....ذبحوني والدم جا مني سكاب
نور الشمس وسارقينو من خدك...حتى الڨمر وغار من ضوك شحاب
يدي طول الليل يڨابل وجهك....سبة ضر غيرتو فاللون ضهاب
ذيك الخانة باينة تحفت زينك....فوڨ الشفة حطها صنع الوهاب
شعرك دامس راب كي غطى كتفك...ليل تناصف جانبر والجو سحاب
واللولي مرجان يلعج في فمك...طبعاتك تبسامتك كي بان الناب
ناب مبرم لون شمعات المحسك....ولي ثلج وبانلك من بعد ظباب
ولي كي قرطاس مزال مسك...صفحة بيضة هاربة من نص كتاب
خايف مالعذال ماڨلتش اسمك....منقوش اسمك في ڨليبي بالتخباب
شوقي ولد الزاب مقتول بحبك....ودفن حبو في عيونك حين نصاب
حتى ڨبرو دايرو داخل ڨلبك...كاشف سرو فالقصايد دون حجاب
كل قصيدي نكتبو غير بوزنك....وتحنن في لوغتي نغمة قصاب
نتكتم ومانطيق على سرك....تفظح فيا ليعتي والشوق لهاب
حتى شعري فالقصايد كي فضحك....وعلى صدرك بان شعري نعت سخاب
