قصيدة:(لو تدري) نظم الشيخ العاقل
بن عامر الملقب عقاب الصحرا
ما نلوم الدنيا و الحال غير يمرار
كان فاد اللوم الا فاد مول لمطا
ضائقة والواسع حرموه قوم لشرار
والظلام امقعد للنور كي القرطة
ما رضيتش بالعيشة هاك هاك تدفار
ساكن العز ضميري ما تلاش يخطا
ياك من راس الكاف يجي السيل جرجار
والوطى كان مشاه ضعيف زين واوطى
راه ڨمحي صافي ما فيه لول وغبار
والمطامر متخومة كل عام مرطة
حين جبت كلامي فاجيت بيه لضرار
غير نردي ممسوط من الزمان مسطة
انا العاقل والعاقل ما يليق يحتار
ما يطلعله دم ولا تجيه جلطة
أنا الواحد في لول والتحت لصفار
قي اللي واحد كيفي جابها النقطة
انا حفظت الامية في كلام شنفار
وسكرت بالمفردات اللي تزيد خبطة
انا الوافي من وافي من عود لثمار
حين يضمى تلقاه من اللباب يرطى
انا اللي لججت اللي شاردة ونفار
وانا اللي نتخير ليها رقيق وارطا
وانا اللي نضمكها ونلظها لوعار
كل بيضة لازم ليها خويض خلطة
انا الدازي قباب ايعيفو الوروار
ما يخاف صمايم وايامها الشمطا
ما علابالهشي بامام جاي فسار
فرعون جائر في صحرا والاحكام سلطة
صحرتي يعشرها من هو طويل لعمار
قي اللابي من سي ضروعها اتسخطى
تلقاه يسمك ايام قتامها القبار
ويشوفها عادي والدنيا تقول سخطة
يربي افايج بالنقلة ما يجيش حكار
ما يكون مندوه يخاف اذا يعود يبطى
تلقاه يتشرتل يتحرمل دار لجدار
حدها حويطة ويزيدها حويطة
تلقاه نزاف ايكوط لقحات وحوار
ما عرف لون العلف ولا يضوق ڨرطة
يتوزها يحزمها يلوي لي لقمار
حتان تتحك ذراها حامية الشطة
يضكها يرمكها حت تعود كركار
حتان تڨلال تولي قد الشطاطا
يبقي صباحه مربح وايصابحوه لبكار
حين تنشر تلقاه يزيدها الحيطة
تلقاه نفخة لا كان الوقت جاه دمدار
ويقابل الريح العاتي ويزيد نشطة
تدري الخيل نواصيها سعدنا ولزهار
هيا اللي ربي عاطيها بعز معطى
تدري العود الدامي يشبى كي جعب شار
والملط يصلح العودة كي تكون بلطة
تدري ركوب الخيل انايا عليه نعار
تدري الزرڨ الشحب دزاعين لقطا
تدري الكفل العامر ايميزوه لنظار
والركاب يزيد اللي زاحفين نطة
تدري الحمرات يشقوها الحرث قورار
صابا اتدهش حصادة في حزيم ربطة
تدري الشهبات اذا تلفت قاع لشوار
يتقطعو مثل الغيم ازطاطا ازطاطا
تدري الصفرات الردف حاملين لمهار
حين كانو خووي سبقو الريح وابطى
تدري الدهمات يسوجو والظلام غدار
في النهار الڨهار ايطيرو المغطة
تدري الدم من الڨيز يجيب قي النوار
يطوو المرت اللي عنڨر في فرد خرطة
تدري الحمر البرقوقي كي الدم شرشار
اذا شلطهم السيف تقول خاب واخطى
تدري الدهم الحجل كالظلمان هجار
ما ايربوش الحافر ڨاصفة المشطة
تدري الصحوان يشقوه البيض لا جار
بعكسو لون الشمس ايهجعو القنطة
تدري المشوار على الزرڨات دار في دار
شد الصراعات يعود من التعب ورطة
تدري الحشاديات ايقصفو المشوار
تدري ابن الشارف يدهش في نهار عيطة
تدري زراڨي نيلية مايلة لخضار
كيما الريح الظهراني سايطة بسوطة
تدري حماري بهاتة لونها اصفرار
اذا اتملصت سحت وسبابها الفرطة
تدري رمادي في الجبهة حاطة الدينار
نجمة اتفدفد في جنح الليل كان غطى
تدري الهايب من هايب في اثنين ڨدار
والبلا خاطيهم ولا ارضاو سقطة
تدري الداوي من داوي ما ايشعلو نار
ما ايديرو لتاي ڨبالها وتبطى
تدري الخاوي للخاوي عاميين لقعار
يبقو العتمة والقمرة ما اتدير ريطة
تدري العامر والعامر ياك ذوك ذكار
لا شافت العاڨر فيهم رايحة الحنطة
تدري الفرحة مطولها في الزمان تقصار
تدري الساعة في القرحة كي شحال تسطى
تدري الرانڨ لمسرح كي تضيق قرار
كي يديرو بالحق الظالمين بسطة
صلوا على النبي
