يا راسي لا حديث يندس
يا راسي لا حديث يندس * لا سر يموت سر يمسى
و اللي خانه اللسان ريب بيده ساسه
لا تتوطى ف كل مجلس * و احذر وذنين جاوا عسة
يتنقل الحديث و السر عجب جوساسه
الجسد سفينة انت الرايس * قمباس تدخله لمرسى
حاذر بحر اللطام من لا تفقه غواصه
ارميت حديثي ف بير ناخس * متمخض بالحمى اتنسى
سرعوا متطفلين من يسبق بمرجاسه
في الألف لسان فرد يخرص * ما يعطي للحديث قصة
كان تساله يعيد لك مسلسل من ساسه
ابليس طبيعته يبسبس * يستخدم الرجال و نسا
و اللي هَدُّه الخبال تتبرا منه ناسه
ظهري من ذالمحان دنڨس * محال تعدله اللبسة
حتى فمي نهار و الهم ريب ضراسه
نهجر اهل اللغا الباخس * ما نسمع ما نشوف دسة
في خلوة خير ننعزل غير القلب و راسه
ما نغتب حد ما نوكس * ما نطعن في طريق غرسة
ما نشرب من خويض و المر نتفادى كاسه
وني للضيق لا تهمس * كي لعما ما تفيدك عصى
عثرة لسيادة كالفضيحة قادر يبخاسوا
هذا يبكي و ذاك يرقس * لاخر ينهش في فريسة
ويح المعلول بالمحاين طايح قنطاسه
