قصيدة..."غيرة" الشاعر احمد النويبات

منّك فاض على شطوطي بحر الود // يا من اسمك فاح منو مسك الفال
انغير اعليك وغيرتي نا فــــــوڨ الحد // نتغير ويهز عقلي ريــــــــــــــح اهبال
دمي يغلي فــــــي عروڨـي مانجحد // فــــــــي ڨـلبي نارين وانتيا مشعال
ولّالي بركـــــــــــــــــان جمرو ما يبرد // نا حالي من غيرتي يا طفله حـــال
مـــــــــــــن لعباد انغير ,نظرتهم تصهد // مـــــن خزرات الطير وذكور الفشتال
من ضحكة يشير , مـــــــن صبي يمرد // من ورد اتشميه فــــــــي يدّك يذبال
مـــــــــــن نسمه عدّات مرّه فوڨ الخد // من كلمات احنان فـي وصفك تتڨال
مــــــــــــــن لعرڨ حبّات ع الرڨبه هوّد // من حفنات الماء اتكب اعليك وسال
مـــــــــــــــن خيّال امنام ك عينك ترڨـد // مــــــــانرضى يزيارتو هــــــاذ الخيّال
اســـــــــــــــمك لذكروه ,لفريسه ترعد // نهبل لغنّاي ڨـالو فـــــــــــــــي موّال
منّي انغير عليك فـــــي روحي نحسد // ونولي مجنون فــــــــــــــي بر العقال
انغير على عي* مــــــن كحل المرود // مـــــــــن سلّاكه فـ الشعربعد التخبال
مــــــــــــن حنّه غطّّاتلك رجلك و اليد // من لمناڨش ماضيين ڨـرون اهلال
من لخواتم فـــــــــي صباعك جاوك ڨد // من لمڨاوس فــــــي زنودك والخلخال
مــــــن كتان يمس لحمك خفت يشد // مـن عطر اتحبيه ساكنلك فــــ البال
من لمرايا خـــــــــــــــايف اتوليلي ضد // تغرم بيك تعود ثاني فيـــــــك اتسال
انغير عليك وغيرتي نا فـــــــوڨ الحد // هاذ الغيرة سيفها مــــــــاضي ڨـتاّل
هاذ الغيرة سيفها مــــــــاضي ڨـتاّل
هاذ الغيرة سيفها مــــــــاضي ڨـتاّل
ـــــــــــــــــــــــــ(أحمد نويبات)ــــــــــــــــــــــــــ