قصيدة للشاعر الشارف بخيرة من ولاية
غليزان ربي يرحمو عنوان القصيدة
المشيخة
عبيت بسرجي مال والحزام ترخى /*/ العود بقى بيا قطع كم من فرسخ
طريق طويلة قطعت كم من ملخة /*/ الجاري فيها عيا وقلبه تفسخ
نبكي بادمعة عيوني مشتمخة /*/ ضايقت روحي الروح في جسدي تطبخ
حامل وادي خويض في راسي دوخة /*/ ندنهد زعفان قانت متكوفخ
نمشي في طريقي لقيت المشياخة /*/ حفيانة مغبون في لباس موسخ
عجوز كبيرة في يدها مطرق كلخة /*/ تعثر نوبة تميل نوبة تدردخ
سالتها واش بيك يا سهم النفخة /*/ الشنا والبرهان والعلم الراسخ
بنت محال سويد غاشي بن دوخة /*/ اسمك فالكتوب مرسوم متورخ
شبوبك ونظرة همة وزياخة /*/ ويدين العشاق عليك دبخ
وفراشك حرير ومخايد كمخة /*/ عروسة بين جلوس عذرا تترخرخ
شاوك فالعزكان سطوة وتناخة /*/ كشفوك على عقايبك وجوه المسخ
ارخس شانك بعوه للشاري برخا /*/ واستفخر بيك شيخ حواص مشيخ
ماهو مربي ما عرف الكلام زخة /*/ خاوي مافيه فايدة راس بلا مخ
عين بلا شوف ووذن بلا سمخة /*/ فم بلا جواب عند الناس مرخ
يغني بكلام سرقو من نسخة /*/ ويقول أنا فصيح يتكلفى يشمخ
كلمة من مغريب من هدرت واخة /*/ كلمة من شرق تونسية متفردخ
يلاقي ذي مع ذيك يتغيون يزخى /*/ والشيطان كبير في صدرو ينفخ
شيخ بلا شيخ ما ظهر بين شيوخة /*/ بلا خمارة عجين عمره ما ينبخ
الحامق و السخاف تقبضهم فخة /*/ ولو يطول الحال بيهم يتمرخ
شيخ الوقت عليه فازت زوليخة /*/ تغني بكلام السوء فالغاشي تسلخ
مال الغشمة مشى لهم راح كناخة /*/ عز الحرمة نعاف فذل تلطخ
المسك الغالي عليه عشات نوخة /*/ والقرمز فالصوف ولا فيه التخ
انحطت لطواد واعلات السبخة /*/ حرج العقبان سكنو زاوش فرخ
وارخس شان البر واغلات الكيخة /*/ والحرير الدوم ضادو بضلف جلخ
الأسد راه يخاف يهرب من النخة /*/ والمدفع صوتو كن والمقلع صرخ
حال الدنيا كيف لعب الزرناخة /*/ هذا غالب ذاك مغلوب مكوفخ
ولد بخيرة للي نظم حروف الخا /*/ ارحمني يا رحمان يا رب البرزخ
تمت القصيدة