الجزائر*** شاعر ساعد كمال

الجزائر

جزاير لو كان حبوك ملايين
عرفيني من الاولين انا كنت

واذا من حبوك كانوا غير اثنين
كنت اولهم دام فوق ترابك عشت

مجاهد صنديد مرفوع الجبين
مانتبدل لو على جالك نشنقت

وطني بعد الله ورسولو الامين
في ديني محال انا ماسلمت

حبو ياتي بعد حب الوالدين
اصلا هوما وطن وانا فيه نشأت

حبك ياوطني سكن فالشرايين
ياوطني من غير حبك واش رضعت

ياما فالحدود بتنا سهرانين
بردانين وواقفين انايا بت

شور جبل عصفور كذا من كمين
كذا من سموم طيحت وما طحت

ما فكرت نخون أرض الثوريين
رغم المحنة والغبينة واللي شفت

ماخممت نبيعها كيما وحدين
انا من الاشراف الامانة ماخنت

مانرضاش الذل صاحب نيف رزين
نزيه وصبار على الخيانة صمت

دونك وطني فين نجبر حضن حنين
إذا نا ضيعت حضنك راني ضعت

ياوطني لوكان خانك شياتين
عبادين الغرب مانرضى بالصمت

ندعوهم لله رب العالمين
يورينا برهان فيهم ذا ماطڨت

ياوطني واذا تحوس نجادين
ساعد ساعد يا بلادي الاول صبت

ولو حوست وما لقيتش محبين
تأكد ياوطني بلا شك اني مت

كلمات: ساعد ساعد