حَلُّــــــومْ ـــــ الشيخ البشير التهامي

حَلُّــــــومْ

الشيخ البشير التهامي

حَارَمْ نُومِي بِيكْ شَاغْلْ احْلَامِي * يَقْضَـة وْ عُمْـقْ لَمْنَـامْ
نَارْ الْمْهَاجْ مَعْلُـومَة * فِي الْجُوفْ ضَارْمَة مَتْحَزَّمْ للشُّومْ
مَتْسَــوَّدْ يُــومِي بْهَــامْ بَغْيَــامِي * مَطْمُوصْ سَعْدْ مَظْلَامْ
بَلْوَة وْ جَاتْ مَحْتُومَة * سَلَّمْتْ مَا قْــدَرْتْ نْعَافَـرْ مَسْقُــومْ
هَالَكْ بَحْرْ هْوَاكْ مَعْتْصَرْ طَامِي * مُـوجُه دْفِيـقْ تَلْطَـامْ
رْيَاحْ الْغْرَامْ مَلْغُـومَة * لَا جَفْــنْ لَا سْفِينَــة تَقْــدَرْ تْعُــومْ
قَامَةْ سَـرْوَلْ بِيكْ شَامَـخْ عْلَامِي * قَبْلَـة وْ قُطْبْ لَسْـلَامْ
مَكَّـة نْجِيكْ بَالسُّـومَة * يَا طَلْعْــةْ الْبْــدَرْ مَتْجَنَّــدْ بَنْجُــومْ
التِّيتَانْ زْنَاجْ فِي فْصَلْ حَامِي * فِي غَسْقْ لِيلْ مَبْهَامْ
بْحُزْنْ الْغْرَابْ مَتْهُومَة * وَ الزَّهْوْ عَنْدْهَا يَجْلَبْ خَيْرْ الْقُومْ
ألْغُــرَّة نَعْتْ الْهْلَالْ فَ ظْلَامِي * هَـــالَة عْلِيه تَبْسَــامْ
عْلِيهْ النّْجُومْ مَلْمُومَة * سُلْطَانْ بِينْ وُزْرَا بَازَغْ قَيُّومْ
حَاجَبْهَا كَالْقَـوْسْ صَاوْبُـه رَامِي * صَابْ الْمْهَاجْ بَسْهَامْ
خَلَّى الذَّاتْ مَهْزُومَة * نَادِيتْ مَا سْعَفْنِي نَاصَرْ بَدْعُومْ
مَسْبِي بَحْلِيمَة مْـــرَاحْــةْ نْيَـــامِي * خُودَة شْبَاحْ لَــرْيَامْ
بَـدْرْ الْبْـدُورْ حَلُّـومَـة * رُوفِي نْجِيكْ يَا بُو سَالَفْ حَلُّوم

رَمْقَاتْ الْيَطْلُـولْ كَالْجْعَبْ دَامِي * تَـرْمِي شْرَارْ هَــزَّامْ
وَ هْدَابْهَا الْمَرْقُومَة * مَا لِي نْجَاتْ مَنْ نَجْلَاتْ الزَّهْزُومْ
نَارْ الْبِينْ وْقُودْهَا فْ تَحْطَامِي * مَضَّاتْ لَحْمْ وَ عْظَامْ
رِيحْ الْهْوَا الْمَلْغُومَة * بَجْيُوشْ يَاسْرَة سَحْقَتْنِي مَهْزُومْ
بُحْتْ بْسَرِّي لِيكْ رَافْعْ عْلَامِي * مَا عُدْتْ لِيكْ نَجَّامْ
جُنْدِي نْكِيسْ مَهْزُومَة * عَاطِي الطُّوعْ لِيكْ مْقَيَّدْ مَلْجُومْ
بَرَّادَةْ مَشْهَابْ فِي حْشَا ضَامِي * فِي يُومْ حَرّْ وَ صْيَامْ
طَفِّي الْحْشَا الْمَضْرُومَة * نِيرَانْ مَا يْضَاهِيهَا حَرْبْ نْجُومْ
مَلَّاكَةْ عَقْلِي فْ لُبْ تَخْمَـامِي * في الْقَلْبْ وَكْرْ وَ مْقَامْ
مَتْصَدّْعَة الْجَمْجُومَة * بَالْفَايْقَة نْهَاتِي فَاضَحْ لَكْتُومْ
مَا مَثْلَكْ دْوَا عْـــلَاجْ لَسْقَامِي * حُــــرَّة بْــــدُونْ تَلْقَــامْ
تَرْيَاقْ ذَاتْ مَسْمُومَة * طُبِّي عْلَايْلْ الْقَلْبْ فْتَنْ مَغْرُومْ
أمَّارَةْ السُّـــوءْ زَلّْتْ اقْـــدَامِي * فِي وَحْلْ طُحْتْ مَعْدَامْ
بَعْدْ انْ انْسْقِيتْ بَالُّومَة * فِي اللِّي عْتِيه مَثْلِي مَا يَنْفَعْ لُومْ
مَسْبِي بَحْلِيمَة مْـــرَاحْــةْ نْيَـــامِي * خُودَة شْبَاحْ لَــرْيَامْ
بَـدْرْ الْبْـدُورْ حَلُّـومَـة * رُوفِي نْجِيكْ يَا بُو سَالَفْ حَلُّوم

غَارَقْ فِي وَذْحِي نْعُومْ فَ حْرَامْي * أنَا غْشِيمْ لَغْشَامْ
مَا رٍيتْ نَفْسْ مَظْلُومَة * هِيَّ مْشَرّْبَتْنِي كُوزْ الزَّقُّومْ
كَاظَمْ غَيْضِي نَارْ لِيعْتِي كَامِي * جُوفِي شْبِيهْ حَمَّامْ
مَصْهُودْ ذَاتْ مَحْمُومَة * مَكْوِي وْ غُصّْتِي فِي جُوفْ الْحَلْقُومْ
نَهْجَــرْ أُمْ الْعَــارْ سَبّْةْ هْيَامِي * نَرْقَى لْعَبْدْ مَقْدَامْ
نَكْسَرْ قْيُودْ مَبْرُومَة * وَ نْبَاشْرْ الْقْمَرْ وَ الْخَدْ الْمُوشُومْ
ذَلّْ الْمَعْصِيَّة مْكَــدّْسْ غْيَـامِي * مَشْتَاقْ عَزْ لَسْلَامْ
تُوبَة بْحَجْ مَخْتُومَة * وَ نْعَاهْدْ الْعْفُو مَا نَرْجَعْ لَلشُّومْ
في الله يْقِينِي يْسَــدّْدْ اقْـــدَامِي * يَشْفِي غْصَاصْ وَ دْغَامْ
مُهْجَة زْهَاتْ مَغْرُومَة * بَالْفَايْقَة الْحُسْنْ ضْرِيفْ الْخَرْطُومْ
وَ لله الْحَمْـــدْ فُزْتْ بَمْـــرَامي * زَهْـــوَة لْقَلْبْ بَــرْطَامْ
زَالْ الْغْيَارْ بلْزُومَة * مَنْ شَاوْهَا الدُّنْيَا لَا حَالْ يْدُومْ
رَحْمَةْ الْبَارِي غْشَاتْ في خْتَامِي * وَجْدِي بْلَغْتْ لَمْرَامْ
بُشْرَة لْذَاتْ مَكْرُومَة * وَ الْخِيرْ لُو تْنَالُه يَاتِي مَقْيُومْ
مَسْبِي بَحْلِيمَة مْـــرَاحْــةْ نْيَـــامِي * خُودَة شْبَاحْ لَــرْيَامْ
بَـدْرْ الْبْـدُورْ حَلُّـومَـة * رُوفِي نْجِيكْ يَا بُو سَالَفْ حَلُّوم

تْبَارَكْنَا بَالْغِيثْ فِي فْصَلْ سَامِي * بَاذْنْ الْغْنِي الْعَلَّامْ
وَ رْوَاتْ أرْضْ مَضْيُومَة * بَعْدْ الْعْجَافْ شَطِّي بَرْعَمْ مَنْعُومْ
بِينْ الْكَافْ وْ نُونْ بَدّْلْ مْقَامِي * مُحْيِي رْمِيمْ لَعْظَامْ
نَفَّسْ هْمُومْ مَغْمُومَة * طُوبَة لْمَنْ كْفَاهْ الْحَيْ الْقَيُّومْ
مَنْ حَسْنُه وَ بْهَاهْ فَايْقْ الشَّامِي * مَرَّحْتْ فِيهْ لَنْيَامْ
فُرْجَة بْهِيجْ مَغْنُومَة * وَ بْكِيتْ في الْجْبَلْ مَعْظَمْ ذَاكْ الْيُومْ
صْلَاةْ الْمُقْتَافِي خْتَـــامْ لَكْلَامِي * طَهَ شْفِيــعْ لَانَامْ
قَدْرْ الْمْدَادْ وَ قْلُومَا * وَ حْرُوفْ نَصْبْ جَرْ مَرْفُوعْ وْ مَجْزُومْ
خُوذْ آ رَاوِي طَرْزْ تَاقْنُه حَامِي * مَ الْمَاهْرِينْ نَجَّامْ
حُلَّة دْبَاجْ مَرْقُومَة * يبْرِيزْ حَابْكُه في تُحْفَة مَرْشُومْ
كَانْ أنْتَ سَالُــوكْ قُــولْ تهَامِي * بَشِيرْ صَاغْ لَنْظَامْ
مُولْ اللغا الْمَزْمُومَة * مَشْغُوفْ بَالنّْبِي قَبْلْ وْجُوبْ الصُّومْ
أسْمِي مَا يَخْفَى شْهِيرْ وَ مْقَامِي * بَالذَاتْ مَسْكْ لَغْنَامْ
دَارِي شْهِيرْ مَعْلُومَة * أهْلَا وْ مَرْحْبَا بَالزَّايَرْ مَكْرُومْ
وَ سْلَامِي لَلْمَاهْرِينْ بَنْغَامِي * وَ زْهَرْ فَتّْحْ اكْمَامْ
جَبْتْ الْعْطُورْ مَلْمُومَة * رَوْضَة قْطَفْتْ مَنْهَا خَيْرْ الْمَشْمُومْ
مَسْبِي بَحْلِيمَة مْـــرَاحْــةْ نْيَـــامِي * خُودَة شْبَاحْ لَــرْيَامْ
بَـدْرْ الْبْـدُورْ حَلُّـومَـة * رُوفِي نْجِيكْ يَا بُو سَالَفْ حَلُّوم