انتي دايا والدواء جرح وبلسم
ونتي فكري وشيب ومحاين ذالراس
انتي. ضلمت. ليل كيعود. مغيم
انتي قمرة فالصحاء سعد الحراس
الى غبتي انعود جاهل مانفهم
والى احضرتي انتي كتابي والكراس
اذا اتسال. الفم راهو يتكلم
والى اتسال القلب عندو ماهو داس
مرة انولي فارس وعودي يزم
بمكاحل ومعمر اسلاحي قرطاس
ومرة نمشي بالحفاء ويسيل الدم
ومن يسألني انقولو راني لاباس
اذا غبتي انعود ساكت مثل أبكم
والى احضرتي نسكت الذاكي فالناس
بيك انتيا انعود سلطان ونحكم
انحس بروحي مثل رايس م الرياس
انايا مثل اسفينة وانتي يم
لو مابحرك مانعود انا غواس
لوما بحرك راه شقفي. يتحطم
وينا فلك جرى على ضهر الكياس
وبلى بيك انعود مانسوى نخدم
مانصلح انعود راعي لا خماس
بيك انتيا الواعرة ليها نزدم
وبيك انتيا انسافر ونعرف لجناس
وبلى بيك انعود كي لعمة نوهم
باب الدار انتلفو ويدوخ الراس
بيك انتيا كل شيء حاضر ونعم
خوك وبوك وخادمك رايس حراس
وبلى بيك انعود جايح مانفهم
مثل اللي ضلموه راشي في لحباس
انتي ليك اجيوش والرايس يحكم
عندك خطة والصبر عندك قنباص
انتيا. صياد بسلاح محزم
ونا ليك الصايدة وانتي قناص
لولى قدرت ربنا هو يرحم
راها عمري بين صبعك والقراص
مرة قلبك كي لحديد وحجر الصم
مرة قلبك كي الزبدة. فالترفاس
مرة السانك موس في قلبي يقسم
مرة السانك كي لعسل من جبل وراس
مر اتكوني مقربتني شق ألكم
مثل العاصمة احذاها بومرداس
ومرة اتكوني مغربتني كم وكم
انتي مغنية ونا سوق اهراس
كلمة منك كل. عوجة تسقم
وكلمة منك كيلي ضربوه بفأس
خزرة شينا تزيدلي هم على. هم
وضحكة منك كيلي داير لعراس
ونا اتعبت وفي هواك عييت اللم
اخلاص العمر ومابقى هو يخلاص
القلب القاسي ماخفق مايتالم
واللي قلبو حنين من رمشة يتقاس
العبد الجايح مافهم مايتفهم
واللي ساجي يفهمك قبل التنفاس
ياك الكلمة الخايبة راهي تهزم
وكاين كلمة فالقطع فاتت لمواس
متربي واضريف متادب نحشم
صريح وشفاف مثل الماء فالكاس
انتي وليلي والقصيدة. ونخمم
ان آيس ونقول. ما نقطع لياس
مرة نحلم جايبالي ماء. زمزم
ومرة انقول انتي اشقايا والوسواس
عليك انتي نحط سيفي ونسلم
وعليك انتي اندير ثورت بالعباس
وعليك انتي اندير عرسي بنت العم
وعليك انتي اندير حفلة في مكناس
تسواي وتغلاي واش يعد الفم
انتي اغلى من القصر بيه بلقواص
انتيا تسواي عشرة الف اغنم
وعشرة الف اقليل في كحلت لنعاس
انتيا وانتي وبيك انتي نختم
لولى انتيا مانكون اناتراس
لو مانتيا راه آدم منعدم
ولو ما حواء ياك ذا لعالم يخلاص
الى اتسال على الشاعر والمرسم
ادخل بوفاريك سال على دلاس
ومن أصل بواعيش قمة فالكرم
قوللهم بوعلام تفرح بيك الناس
هذي هيا قصيدتي رايح نختم
وياقريها كون للمعنى. دساس
انتي دايا والدواء جرح وبلسم ــــ الشاعر بوعلام بن سليمان الخميس أكتوبر 06, 2016 12:32 am
