....... قصيدة صياد لوهام .......
عاديت الي شرى وصالي و شريت الصد و لوهام
و اصغا يا فاهم انضام
و القلب الي عمى دليلو صياد مكين ما صفى
شاورته قال في هبالو انا ما عاد لي كلام
سدد في ذاتي سهام
مفتون و شاعلة جمارو و يجاهر بيه ما خفى
عقلي ما دار لي مزية بين الصحوة و المنام
يبني و يهد بيه هام
في بحر بلا شطوط عايم ناسي حالو ما شفى
ساعفت انا و قلت بلاك الظن يزيد فالاثام
يبرى قلبي و يستقام
و الدنيا كي نزوه ساعة نغنم من طيبها اكفى
محبوبي زارني عشية و سقاني شهد الكلام
و الوقت يفوت كي منام
و الفرقة جاتني صعيبة نضحك ضحكة مزيفى
ليام الصادة قبالي و نهار يفوت فيه عام
ما ينفع ذكر لا صيام
و الليل ضحالي نهاري و نهار انا متلفى
ظنيتو فالهوى بحالي محروم و حارم المنام
و الجسم فنا من السقام
جربتو فالهوى لقيتو كذبة تمشي مغلفى
هاني ما داري بحالي سوام لسوق الريام
جربتو ما بقى ملام
في كل ثنية لقيتو عاطي عهدو ما وفى
و الهم الي نسى العشرة ولالي قاصد المقام
و بكى في حضني و نام
وردة في جنتي ذبالت شمعة في كاس تنطفى
ضاق عليا الحال نبكي و الندمة موس فالعضام
و انا و عذابي توام
لا نوم حلالي و توبة راها مني مصرفى
هذا حال الهبيل ديمة ما يسمع نصح لا كلام
بدل الصح بالوهام
و يبيع الي شرى بغالي و الصح عطاه بالقفى
لازم نرضى و ليه نشكر فضالو جات بتمام
ربي دايم بالدوام
نوصيك على الحلال دور لا تغويك التالفى
جيتك يا خالقي بنية و لي قصدك ما نضام
طالب زورة للمقام
تغفر ذنبي و ذنب عاصي و رضى يا صاحب العفى
قصيدة صياد لوهام ـــــ الشاعرة سعاد لخضاري الأربعاء أكتوبر 19, 2016 3:44 pm
