$$$$$$$$ المهبول $$$$$
- كنت بعقلي مين كنت انا مهبول ..وإذا قلت بريت عقلي ودرتو
- كي نهبل نسلك الخيط المخبول ..وبعقلي ذاك المسدي خبلتو
- كنت نفك الهاربة من فم الغول ..وكي وليت بصحتي ظلي خفتو
- كي نهبل تتزادلي بسطة في الطول ..كي باي سطنبول ولا كي تيتو
- كي نهبل نحكي ونعرف واش نقول ..عند هبالي كل مانبغي قلتو
- يتصنت ليا العادي والمسؤول ..وكي نستعقل بالعقل فيا شمتو
- كي نهبل في الفنةوالعلوم نصول ..وكي نصحى من لهبال ليف وتلفتو
- بهبالي دويت كذا من معلول ..وبعقلي كل عاقل هبلتو
- بهبالي دسيت سري في المقفول ..وبعقلي خرجت سري وفظحتو
- أسجى غرسي بالهبال ودار ظلول ..وبعقلي ذاك المنور يبستو -
قلت انيا خيرلي نبقى مهبول ..شفت العاقل حد ماسمع صوتو
- العاقل في بلادنا ولا معزول ..عند عربنا كي حياتو كي موتو
- العبد الحشام خلاوه الرول ..قاعد يستنى ولخرين يفوتو
- في جيلي بدلو الذهب بقشور الفول ..أشراو الريح والبحر بيه بحوتو
- لاحو تاج العافيا ورضاو الهول ..والعاقل حطو نار على زيتو
- الله يداوي حالنا ياسي جلول ..هذا آخر الزمان رانا في وقتو
- شفت لي رقبة يتحي للمذلول ..وشفت الجهالة على المنبر يفتو
- العقالة رضاو بالعاقل ديقول ..ولي هبلو طفرت فيهم ماتو
- العقالة عقولهم في البرابول .. وانا بهبالي البست وكسرتو
- كي نهبل نبدي نرتل في المنزول ..حسب هوايا كلام ربي أولتو
- كي نهبل نطيع ربي والرسول ..وكي نصحى من لهبال الدين وسبيتو
- أسمع ياصاحب العقل ودير المعقول ..وهبل كيما انا تشوف لي شفتو
- نطلب ربي هاكذا نبقى مهبول ..ينعل بو جد العقل ما خصيتو