لكل ليلاه وليلاي ســلا
سْلْوَانْ القلب والرّوح
رَاحْتِي وْهنَـايَـــا وْعْنَــايْتِـــي فْسْلْــــوَانْ
حُبّْهَـــا خْلْخْلْنِـــي وْفْـــــرَاقْهَــا كْوَانِـــــي
اِيلاَ وْصْلْتِـي لْسْــلاَ للــه يَـــا الْوْرْشَــــانْ
بْلّْـغْ سْلاَمِـي لْلصّْحْبَــــة وْالْعْشْــرَانِـــــي
يْجْزِيكْ المُولَـى عْنِّـــي بْخِيــرْ وْاحْـسَــانْ
مْعَ طْيُورْ الْجَنَّـة تُحْشَـــارْ وْالْجْنَـــانِـــــي
نَار هَـادْ الْغُرْبَـــة تْكًــدِي بْغِيـــرْ دُخَّــــانْ
يَا مْحْنْتُـو مْــنْ ذَاقْ الْبِيــنْ وْالْهْـــوَانِـــــي
بْعْدمَـا كُنْــتْ عْـزِيــزْ فْلاَمْتِــي وْنْشـــوَانْ
صْرْتْ مْن ذَا الْهْجْرَة مْهمُــومْ كَانْعَانِــــي
قسم 2
لِيسْ يْسْلاَ قْلْبِــي وَالاَ نْكُـــــونْ فَــامَـــان
غِيــرْ فْسْلاَ مَــا بِيـــنْ السُّورْ والسّْوَانِـــي
مَانْسِيتْ انْزَايْــهْ لاْشْيَــاخْ بِيـنْ لاْغْصَــانْ
عْلَى نْغَامْ الْمَلْحُــونْ وشَـــــايْ فْالصّْوَانِـي
القْصَايْـــدْ لْعْجِيبَـــة رَايْقَـــــة بْاِثْقَــــــــانْ
نْغَامْهَــــا عْذْبِيَّــــة بْالطّْبْــعْ وْلاْوزَانِـــــي
مْسَاوْيَـة بْالْعُــود اُو كَمَانْجَـة وْسُــــوسَـانْ
تْسُّرْ خَاطْـرْ مْنْ هُـو مَوْلُــوعْ بْالْمْغَــانِــي
ق3
يَا الدَّاخْلْ لْسْـلاَ سْلّْـــمْ لْــهْــلّْ لْمْكَــــانْ
عْلِيكْ أَمَانْ اللـــه اسْـــلاَ وْكُــونْ هَانِـي
بْلاَد الاَوْلِيَـا لاْشْــرَافْ اهْــلْ الدِّيـــوَانْ
القْمَاهْــرْ ذْالْقُــولْ ضْــرَاغْــمْ الْمْعَانِـــي
كُلّْ مْنْ جَالْسْهُــمْ عْـلاَ وْصَارْلُـو شَــانْ
وعَادْ جْبْحُو مَالــي بْالعْلْـــمْ والْمْتَانِـــي
سْلاَ مدِينْة الْحْضْرْ لْمْشْرّْفَة مْن زْمَــانْ
اسْــوَارْهَـا لْمْنِيعَـة وْبْـرُوجْ فْالرّْكَـانِــي
قسم 4
مِيرْهَا عياشــي ورْجَــالْهَــا الفُرْسَــــان
دْمّْــرُو بْمْهَــارْزْ دْالْكُــورْ كُــلّْ جَانِــــي
هْمَامْهَا بْنْحْسُّـونْ شـرِيـفْ مْنْ الضّْمَّــانْ
كْدَاكْ سِيــدِي بْنْعَـــاشْرْ قُـــرّْةْ لعْيَانِــــي
فْالشّْوَاهدْ سِيدِي مِيمُــــونْ مْنْ الشُّجْعَانْ
فْالْجْهَادْ الْبَحْــري مْعْــــرُوفْ بْالتّْفَـانِــي
كُلّْ مْنْ جَـاهَا قَاصْــدْ شْــرّْ عَادْ هْرْبَانْ
خَابْ سْعْيُــو وْرْجْـــعْ بْهْــزَايْمُــو يْعَانِي
بْطَا عْلِيَّا وْقْتَـاشْ نْشــمّْ رِيـــحْ سْلْـــوَانْ
نْتْـزهَّــا بْالنّْظْــرَة فْجْـمَــالْهَـا السَّانِــــي
رَاهْ شْرْبَةْ لْبْـلاَدْ اِلـَـى تْكَــونْ قْطْــــرَانْ
خِيرْلِي مْنْ شْهدْ الْغُرْبَــــة عْلَى لْسَانِـي
تَوْفِيقْ الاَسْمْ نرْجَا عْفُـــــو الرّْحْمَــــــانْ
يْجمْعْنِــي بْاحْبَابـي مَـا رِيتُــو كْفَانِـــــي
توفيق أبرام...ســلا
