قصيدة (نداء القدس)
صرخات القدس يا سيادي عمات الأرض قاطبة
برياح الشوم لاهبة
صهيون على لعباد طاغي كل الأمم شاهدة
ق1
جمع الطُّغاة قسّموها قالو للذّيب مرحبا
هادي وجبة مواجبة
فرضوا بالفور وعد بلفور لقاوا احكام واجدة
هدا حكم القوي فظل الأقلية الغالبة
عيينا بالمطالبة
حق الفيتو مصابنا فالأمم المتّاحدة
دارو لينا ربيع عربي قالو فرصة مناسبة
وبدينا فالمسابّة
هدا يعطي لداك والخو يطعن فالخو ولا هدا
كثرت لحزاب والطوايف وضحات الدار سايبة
حتى لحيوط رايبة
واجتمعنا بلا مزيّة والدّي بغير فايدة
ق2
عربان ضحاوا دون نخوة وضمايرهم غايبة
قصدوا لعدو مصاحبة
شراوا سلاح بالملاير وتجارتهم راكدة
لا ري ولا شوار دركوا لا كلمة جات صايبة
عولاما فالمنايبة
لا نخوة لا ضمير صاحي ينباعوا فالمزايدة
نسا واطفال فالخيام يباتو ليلات ساغبة
وكبايسهم طايبة
يفتخروا بالغنا الفاحش ومشاعرهم باردة
عقدوا بالدّل والمهانة صفقات القرن عايبة
كيف الخرفان هايبة
من صوت الرّعد فالليالي ويطلبوا فالمساعدة
ق3
هبت ريح الشرور شرقية بالنيران لاهبة
مابين خّوت ناشبة
واللي شعلو فتيلها رفعوا رايات المحايدة
قدام الله يا الخونة سيرتكم خايبة
من كاس الذل شاربة
خنتو لاسلام والمواثق ونحزتوا للملاحدا
عم النفاق والفتاين والشمس بقات غاربة
ونجوم الليل شاحبة
طبول الحرب تنتكًر وصوات البارود زايدة
ياعربي فيق من سباتك لا تقنع بالمراقبة
نصرة لاخوان واجبة
غزّة تحت الحصار لازم لحميّة والمساندة
ق4
سال التّاريخ عن سلافي فالصولة والمحاربة
وعلى باب المغاربة
ارجال شداد كالسياتل فالشدّة والمجاهدة
صلاح الدين كان فارس وجيوش وراه راكبة
ماغمض عين ما كبا
حتى صلى فقبة الصخرة لمجيدة الماجدة
شبان احرار ما يهابوا نيران الظلم صاخبة
شوف النّسوان غاضبة
واطفال صغار بالحجارة داروا غارات شاخدة
مولانا يا كريم عفوك يشملنا فالمحاسبة
جودك فات المعاقبة
وكفينا يا رحيم صهد صهود الحفرة الزّاندة
توفيق أبرام .....سلا
صرخات القدس يا سيادي عمات الأرض قاطبة
برياح الشوم لاهبة
صهيون على لعباد طاغي كل الأمم شاهدة
ق1
جمع الطُّغاة قسّموها قالو للذّيب مرحبا
هادي وجبة مواجبة
فرضوا بالفور وعد بلفور لقاوا احكام واجدة
هدا حكم القوي فظل الأقلية الغالبة
عيينا بالمطالبة
حق الفيتو مصابنا فالأمم المتّاحدة
دارو لينا ربيع عربي قالو فرصة مناسبة
وبدينا فالمسابّة
هدا يعطي لداك والخو يطعن فالخو ولا هدا
كثرت لحزاب والطوايف وضحات الدار سايبة
حتى لحيوط رايبة
واجتمعنا بلا مزيّة والدّي بغير فايدة
ق2
عربان ضحاوا دون نخوة وضمايرهم غايبة
قصدوا لعدو مصاحبة
شراوا سلاح بالملاير وتجارتهم راكدة
لا ري ولا شوار دركوا لا كلمة جات صايبة
عولاما فالمنايبة
لا نخوة لا ضمير صاحي ينباعوا فالمزايدة
نسا واطفال فالخيام يباتو ليلات ساغبة
وكبايسهم طايبة
يفتخروا بالغنا الفاحش ومشاعرهم باردة
عقدوا بالدّل والمهانة صفقات القرن عايبة
كيف الخرفان هايبة
من صوت الرّعد فالليالي ويطلبوا فالمساعدة
ق3
هبت ريح الشرور شرقية بالنيران لاهبة
مابين خّوت ناشبة
واللي شعلو فتيلها رفعوا رايات المحايدة
قدام الله يا الخونة سيرتكم خايبة
من كاس الذل شاربة
خنتو لاسلام والمواثق ونحزتوا للملاحدا
عم النفاق والفتاين والشمس بقات غاربة
ونجوم الليل شاحبة
طبول الحرب تنتكًر وصوات البارود زايدة
ياعربي فيق من سباتك لا تقنع بالمراقبة
نصرة لاخوان واجبة
غزّة تحت الحصار لازم لحميّة والمساندة
ق4
سال التّاريخ عن سلافي فالصولة والمحاربة
وعلى باب المغاربة
ارجال شداد كالسياتل فالشدّة والمجاهدة
صلاح الدين كان فارس وجيوش وراه راكبة
ماغمض عين ما كبا
حتى صلى فقبة الصخرة لمجيدة الماجدة
شبان احرار ما يهابوا نيران الظلم صاخبة
شوف النّسوان غاضبة
واطفال صغار بالحجارة داروا غارات شاخدة
مولانا يا كريم عفوك يشملنا فالمحاسبة
جودك فات المعاقبة
وكفينا يا رحيم صهد صهود الحفرة الزّاندة
توفيق أبرام .....سلا
