قصة الجمعية
الشيخ توفيق ابرام
سمعوني يا حضار..لحكاية واقعية
عن فن الملحون جيت نحكيها باختصار
بلساني يا حسرة
ق1
الهروي والسمسار..اجتمعوا فالسرّية
تالتهم ابليس غرّهم بداوا التحكار
صابتهم الجّعرة
ماكاين ما يدّار..قاموا داروا جمعية
ما راموا فيها صواب والا عملو بشوار
نفخونا بالهضرة
ما داروا لاعتبار..للأصل والشرعية
جمعوها وطواو كل واحد فيدو مسمار
ويحك على الدّبرة
ما فيهم ما تختار..غير كمامر لخطية
لعديم و لحقير والدّني وكداك الشفّار
والخارج من حفرة
ق2
واحد خانو لعبار..جاب قوافي عسرية
ومرمة عوجة مكًرجّة ما رامت لشطار
والا حقّت عبرة
ناض يحرك بحمار..والركبة ملّاطية
فالميدان عطات ريحتو كسرات الدّوار
زايدها بالعفرة
جابوا عالم ترتار..قاريها بالعوجية
يتهجا بحروف غاملة يبدا من ليسار
ويحسبوها طفرة
بالشبّة والطرطار..داروا خلطة هندية
فمنابر لخوا تبنّدوا وبداو التخوار
وستحلاو السهرة
ق3
يبانوا فالإشهار..حتى النشرة الجوية
ما تركوا حلقة فسلسة وكداك الأخبار
ويدوزوا فالنشرة
شوفوا داك الشّخّار..داخلها بسلوكًية
جاب معاه سفيه برّزوا ومالين الدّار
يبقاوا على برّا
الحنطة باختصار..فقدات المصداقية
لا موهوب سليم لا ولاعة غير التّكوار
والرياس بكثرة
دارو ليها لاسوار..حسبوها فالملكيّة
فالمحافظة يحفّظوها كيف العقار
ويقولوها جهرا
ق4
ما حركهم وتار..والا نغمات شجية
ما بيهم غنا ولا مواهب دوك الاشرار
غايتهم الشّفرة
بانو ومشا لوقار..من لا عملو بوصيّة
دوك النصّابا قلوبهم قسا من لحجار
واجواف دالمعصرة
من لا فهموا لاسرار..تهمونا بالرّجعية
قوم لّا عرفوا صواب تركوا لبّ الأفكار
ويشدوا فالقشرة
ما ظنوه انتصار..عند الرجّاح شفيّة
شي تابع لخوى وشي مطلّعها بالتخسار
شي غبّرها غبرة
يا صاحي لا تحتار..فشيوخ العدوانية
المتعوس وخايب الرّجا وشبيه القنجار
وجدلو شي حجرة
ق5
يجتمعو علّ لوزار..والزلّة والمعصيّة
لقرافد وكروش كالبرامل وريوس كبار
تستاهل لمزبرة
لحموضة والتّخسار..والقنوات سخيّة
وتخلّظ لغنان بالغنا واخماسي بعشار
والفوضى منتشرة
رحم الله الشّطّار.. لمشايخ دالهميّة
أهل الجود الفايزين والصّلّاح ولحبار
والبصمة بالعشرة
يا راوي هاك اشعار..بلغها للذوقية
لا تامن لمسامر الميادي دوك الفجّار
لكمامر دالقهرة
قول الأسم بجهار..توفيق بدون خفيّة
صمصامي بتار فالقريض سلاوي عيّار
ودكرها بالفخرة.
توفيق أيرام ....سلا
