نبدا بسمك يا الله عالم لسرار
يا مليك الملك سميع أبصر
رزاق المخلوق فالبر اوبيحار
غفار الذنوب ليمن يستغفر
والصلاة على النبي شارق لنوار
محمد شفيعنا يوم المحشر
صلى الله عليك يا ماحي لوزار
يا حبيب الله طه لمنور
وسلام على صوحابة لخيار
هدوك اللي جاهدو العبد الفاجر
ماتوا على الدين ما خلاو العار
بيهم التاريخ يشهد ويذكر
وريضة لجميع ساداتي لبرار
من أمروا بالمعروف ونهاو المنكر
بعد سلامي نعيد ليكم يا حضار
ما قاصاو الجدود ضد المستعر
اقريت التاريخ مطبوع فلسطار
يوم دخول فرانسة للجزاير
فالقران تسعطاش يا سامع لشعار
تلاتين سنة زيدها ليه اوقدر
دخلوا جيش فرانسة بسلاح النار
فأرض المسلمين ولات امجازر
القتلة بالالاف كل ليلة ونهار
واللي مسجونين فالشوم اتكابر
كاين اللي داوهم من وسط الدار
دفنوهم حيين والغاشي ينظر
ارض الجزاير كانت في تدمار
والبكاية بزغارت تتحاور
والبنيان اتهدمت رجعت قيفار
ومدون اوقريات ولاو امقابر
والشعب المقروح يتجرع لمرار
و البياعة السونهم غير امناشر
على الحرية ما بقاش اللي صبار
في عهد الامير سي عبد القادر
هاد الفارس دار فالعديان العار
بنوا محي الدين يامن تستخبر
حير جيش افرانسا هاد المغوار
ما يخشى حرب العدوا ما يستوخر
جاهد اتلطاش لسنة فالكفار
قاري فن الحرب ضد المستعمر
بعهد الله تلايموا عندو لنصار
وشتوروا لبلاد قالو تتحرر
فات القرن وجا القرن جديد ودار
وكان اليوطي عل الخلايق مستجقر
من يعصاه يشربوا كأس التمرار
ويعشي مقتول لحمه يتفزر
متعمد للشر ما يقبل تحزار
عاميه الشيطان طاغي ومجبر
لمدينة بلعباس عمد بالخطار
قصدوا لتلمسان وبلاهم جاير
بالمناوارات كل ليلة ونهار
وصلوا مغنية بالمدافع والعسكر
فالف وتسعماية وسبعة يا حضار
نعيدلكم تاريخ وجدة كي داير
كانوا تمنالاف معدودين اعبار
مسلمين امغاربة والموهاجر
والفين امليهود محصية تحكار
سكنوا وجدة مخلطين مع لكور
تسعة ولعشرين مارس م لشهار
فصباح الجمعة العشرة متقرر
دخلوا جيش فرانسة وجدة بنهار
واليوطي بزعامتوا قاد العسكر
جاب سلاح وجاي بالجيش الجرار
سبعة الف معاه فرسان جبابر
فيهم خيالة راكبين على لمهار
وسبايس وزواف موشات المعبر
بالحيماية حامين الاستعمار
واللي غافل ما درى باللي صاير
وجاو البياعة معاهم فالمشوار
وصلوا باب الخميس بالجيش اتعمر
باب الغربي مطوقينو بالحيصار
وطرقان امسركلة ايمن ويسر
فباب عبد الوهاب مغلوقة لصوار
والشعب المغبون دهشان اوينظر
حتى القصبة سركلوها بالتزيار
وسيدي عيسى راه كلو متحاصر
وطرف قصد سيدي يحيا في شاو نهار
كان الجو اغيام والحال ايمطر
بكات جميع الناس للحي القهار
م الظلم اللي عاد م اليوطي جاير
كذا مقبايل بايعوا داك المشرار
وعصاوا عليه بني زناسن فالامر
كان زعيم ابني زناسن المخطار
بن محي دين يا من تستخبر
قاديري وشريف نسبه م لخيار
بالنية والصدق من جهلو خاسر
وهبو ربي م الحكايم كل أسرار
معدن صافي بالوفا نوره زاهر
لزوية النجوع يجوا زووار
وكل كبار القوم عنده تتشاور
لو نروي لك سيرته فيها تحتار
جاب العز وبيه وطنه يفتاخر
بعهد الله تعاهدوا عندوا لخيار
عولامة وشيوخ فالدين اتفسر
ذكر الله مع الصلاة على المختار
تتصافا لقلوب والخير اميسر
داروا مشورة على قوم الكفار
وفتاوا بالجيهاد ضدد المستعمر
ناضوا جملة ما بقى واحد فالدار
بدات طبول الحرب والحال اتزير
على جال بلادهم هانو لعمار
ضدد العدو ما بقاش اللي صابر
بداو الحرب بني زناسن الثوار
ضدد اليوطي كلفو ليه خساير
المسلم شهيد في جنة لبرار
والكافر فالنار يبقى يتحصر
زاد اليوطي م العساكر والتزيار
في عين صفا حالها عاد مدمر
وحفير اوبركان شدد الحيصار
وبقات المجاعة ولغلا مستمر
غلات الملح وما بقى ليها اثار
وصلت نص فرنك عند لي تاجر
حتى شمعة غالية زادت لسعار
وما عدش فالسوق زيت ولا سكر
قاسات العيباد م الهم والضرار
من كثرت لمراض والجوع الكافر
حتى جيهة فيكيك كانت في تغيار
ومن بوعرفة وزيد مراكش بكثر
والدار البيضة الظلم عليها جار
عيشة مرة حالهم عاد امعسر
ونفاو الخميس بالحيلة والعار
بولاده سجنوه في ماذا غشقر
وظياقت لقلوب م الهم اللي جار
وبكى الشعب عليه م الظلم الجاير
مشات سنين وجا المليك المغوار
براية لستقلال تايخ مسطر
رحمة ربي جات من بعد التعسار
عاد الأمن على الوطن كل زداهر
ناظم دو لبيات خلاها تذكار
رحماني رشيد فالقول اختاصر
ذا تاريخ زمان مكتوب فلسطار
يشهد للاجيال بللي هو صاير
نختم بصلاة النبي طيب لذكار
عين الرحمة شفيعنا طه الطاهر
تمت
تقبل الله منا ومنكم صالح الاعمال