تلاتة عدموا لايفادة
الشيخ:توفيق ابرام
تلاتة عدموا لايفادة.. الجاهل والبوجادي
والناصب خيمتو فكدية من غير اوتاد
ق1
بيهم عابت الكلمة وعواج الخطاب
لا عرف لامجي بكري ..الطنز عندهم عكري
والحنك ماخفى مكري.. لحرام دينهم والخطفة عبادة
دارو براح ينادي.. هدا وقت الركًيع والفتوة دون اسناد
ق2
هادو مسامر الميدة ماعملوا صواب
دارو من الهوى ندوة.. لغراب منهم روى
والسوق عندهم خوا.. نهبوا بلاحساب او طمعوا فزيادة
لا هادي لا مهتادي .. واللي مثلي عفيف قالو عنّو لبعاد
ق3
زاغو قناجر الكًرنة والملحون ساب
لكراف والرّهوط نباو.. باعوا تراثنا وشراو
والوالعين ليس دراو..هدا زمان صالو فيه المرمادا
صار العادي والبادي..يفتي ويقيس فالمواهب والهروي ساد
ق4
حنطة مشرعة سابت ماليها ابواب
قوم البهوت والنكران.. واجباح عامرة قطران
صالوا فصابة الخسران..قالو مسلكة بحصان الطروادة
رادو قهري ونكادي.. وانا سيفي مجردو لجميع الحساد
ق5
ضربي صويب ما يخطا بوم اولا غراب
واللي عماتلو نبريه .. من كاس علقمي نسقيه
قطرة معصرة تكفيه .. ذاك النواعري جهلو فات العادة
مايعرف ذي من هدي .. داخل لمجالس الشطارة من غير عتاد
ق6
يا داخل الزريبة لا تعبا بالكلاب
ما فالوشاق ما تختار.. غير الحقير والقرقار
لعزيز بينهم يحقار ... قوم المعاقرة ماشهدو بشهادة
العادي والمعتدي ...واللي باع الضمير والصارم فيه اغماد
ق7
ركبوا على التراث الغالي مال الركاب
بيهم عابت الطرقة.. زرعوا الشّوك والفرقة
صاروا عبيد للزرقة.. هزوا الخاوية والعامر يتعادى
مازادو غير اعنادي .. مكواني يا اهل المواهب شحطي يتزاد
ق8
فرغات ساحة المعنى فزمان الخراب
العز فالنفوس كبا... لحقير والف الرّْكبة
فالقول دارلو صربة ..الخيل تابتة وحمارو يتمادى
قال يحرّك فرّادي ... لازاد اولا سناد والا بارود ازناد
ق9
شفنا من المكر والنكران بلا حساب
من شي كمامر الكرفة ..الذّل عندهم حرفة
ربي يديرلي صرفة... فاقوام ضاسرة تستاهل لفصادة
داروا للغتبة نادي ... ينهشوا فالعراض ويكذبوا علّعباد
ق10
ياحافظ القصيدة بلغها للنّجاب
وذكر سيرة النظّام .. توفيق منسبي أبرام
قولي شديد علّ لغشام ..فسلا قرايتي والهاجم يتآدى
وانا فالله سنادي.. يغفر ذنبي ولا يحوجني علّ لوغاد