قصيدة ريح القصبة ـــــ الشاعر ميمون الراكب

الى عشاق الشعر البدوي .وعشاق انغام الكصبة - ثامجة -
هذا طيف من حنينها زارني

  ــــ ريح الكصبة ــــ
واسيني اصاح بالكصبة نرتاح ---- وسقيي روحي راح بنغام خفيفة
سلطانة لنغام لكناني مفتاح ---- يتحو ل الريح فجواها شيفا
يسري بيا ليل نرحل دون جناحْ---- يرميني فبحورْ ماليها مرفى
نتفجى مالضيق والغمة تتلاح ----- تزهرْ روح الخيرْ والشحنة تخفى
تعيى النفس تصول تتجبر تقباحْ ----- تلعب بها ريح من جعبة هيفا
حال النفس اغريب تتبلع تقساحْ ---- تفضح كصبة اسراربها ملفوفة
لحن الكصبة سحر يفتن في لرواح ---- يسبيها بنغام يديها خطفة

هولني غيوان منها جا بواحْ ---- طبعو بدوي فيه نغمة ولافة
هلك لي لشجان وحيالي لجرح ----- شاش الخاطر مال عني راه اجفى
طبع الصبا يليْن قلوب الصفاحْ ---- ويهلك اهوال غربة فالمنفى
تشهك لكصب كـي العاشق النواح ---- طال عليه اجفا العارم واتفافى

حتى صوفي جاب فيها ورد صباح ---- يشرح بها احوال نفسو هترافة
صب معاني في مغاني راد فصاح ----- يحكي بها فيض فالنفس ستوفى
تكمد نارغريب من وطنهْ اتلاحْ ----- يخلى ليها في تقاصرْ يتعافى
ينسى بها همْ ريزمْ حط صباح ---- سهم ضبابة عمت الجوف اتغوفي

اطلع ياكصاب حوس في تمراح ----- وتمريل بنغام متقونة حرفة
عيد امراجعْ راوية بدنون الراحْ ---- يسكَرْ همي نفيقْ منو نتعافى
لحن الصبا هيمْ فمقامو سواحْ ---- طبع الحانو حزان تحي ما كفى
تصهدني بنغام تلفحني بكواح ---- كللي مكوي بالمحاور ما يشفى

هلالي طبعي يغيزالمعنى تصحاح---- شهد النبرة يسيح فكناني تصفى
لكلام بارد ما يهز قلوب اقساح ----- حال الرعدة في سحار وارض عفى

واسيني ياصاح بالكصبة نرتاح ---- وسقيني بنغام كًبلي معروفة
ريح الكصبة حال ماينحد اسلاح ---- جنده غازر ترس عليا فخفا
يتكلب احوال كي لبرك شلواح ----- يسني في لدماس سابق العصفة
بين مراجع والتحاوس وقتي راح ----- نسري ليها في ليالي نتفافى
يخطفني تحنان منها جا صداح ----- طبعو بدوي فيه نغمة ولافة
ما ينكرها غير سالم من لجراح ----- ولا خالي من محاين ريافة

اطلع ياكصاب حوس في تمراح ----- وتمريل فوزان متقونة حرفة
سبك ليمن زيد فول بالمداح ----- يحكي حال نجوع وعرب طرافة
ينشد غزوة شعر بالنغمة وضاح ----- يذكر علي كيف فالحزة يلفي
تفرح له وتعيش فالغزوة حياح ----- كلي راك معاه شانك للكوفة
تتمنى لو عاش في وقتك ماراح ---- يوقف سيل هموم هدفت ردافة
في واد لسيسبان يبدع المداح ---- قصية وحكايات واهوال اطريف
نغمة من لكصاب واشعار المداح ---- تتحرر سعات. في ماضي كفى
هذا حال الشيخ عامر ملجباح ---- حفاظ و نظام ما يسلخ جيفة

من ليمن تسير لليسر نطاح ---- تتبدل لنغام و ثلاثية تخفى
سلم على المداح وتركه يرتاح ---- يمرك لك البراح واري ما يخفى
يشهر في لرقاب وخصايل لملاح ---- يسجع في لكلام منثور مقفى
"في خاطر لملاح ليهم ذا تبراح --- كعادين الميل فسراتي علفة"
يردد في لشعار ولسانو فصاح--- يطرب لمريول المدكو بيشفى

فالموال ايبان لخماسي وضاح ---- زوج كصب كران وطولة هيفى
شيخ اركيزة يفصل النغمة تصحاح ---- والرداف يسد خوياتو بخفى
يتبعو كلال بالنقرة وضاح ---- فطرافو دبلون تنقر بالخفة
شيخ النغمة هد بالموال وصاح ---- اتكندوز او شاخ فالحرفة وفى
شول شلا شجان م شواري لتراح ---- والشيب الي شب في لشفار خفى
والصوت الا رق بالنبرة صداح ---- يسدى على سبايل هيفى و نحيفة

اطلع ياكصاب حوس في تمراح ---- راه الليل اقصير وهمومي كفة
ما يكفيها ليل يتمسح بصباح ----- حتى تحيى طراف فجسدى تدفى
تكر الكصبةعلاش ديما فالتنواح--- نفهم منها سر حايل ظل خفى
تحكي لي فحديث كي كانت تتلاح ---- تتسابط في ريح. كي ليكة صوفة
صمدت في ليام وقساحت صفاح ---- بين والسمرة ولصمايم والوفقة

حتى جاها طالب النغمة سواح ----- خير وقتو عصر. وهبوب خفيفة
مياسة و تميل في غدوة ورواح ---- جلبت لو لنظار ورمقها شوفة
حست بعد الحين بعظمها ينزاح ---- حس محشة فات فجدرها وخفى
عيرها مزيان سكمة كي لرماح ---- مبرومة فبركاب كي صاك ظريفة
قسمها بعبار .وبعجها بسلاح ---- ركمها بوشام طلعت في تحفة
حنا ليها ضلوع وصهدها فكواح ---- راغب فيها تصيح بنغام طريفة

تبكي وتبكي في شهكات ابحاح ----- كنه كمري هاج شوقو للولفى
من وهلي والناي يفتن في لرواح ----- شوف لدواد كيف خلها خلفة
لا تحسب نحيبها بسطة وافراح ----- تتشفى وتكول بها نتشافى
حتى هي والغة فهموم كراح ---- دعكتها ليام مافيها رافة

القلب العامر دبرله سبة يرتاح ---- وني غيضه في مسالك للخلفة
دير البال عليه تختله لقداح ---- تغدره كيسان يغتر في حافة
ننتك ما غاس في بسطات املاح --- بعد الصحو يفيق نادم بالخفة
هذا الكصبة شبيه للطير الصداح---- تزهى بيه الناس هو في كشفة

هاوي بدوي كًرْ بسراو بواحْ ---- جاب نظام على الكصبة كيف شفى
غيرة منو على عوايد لا تتلاحْ ----- يربي للتراث حبو ما يخفى
اسمو خمس احروف يفهمها لماح---- ميم ونون بناو . في طرف الحافة
قبل النون الواو بالرفعة تفصاح ---- وسرفْ ذيك الياء بالك لا تخفى
تبقى لينا ميم فوسطهم وضاح ---- تنطقهم اجميع والا سم تكافى