الشاعر البشير التهامي
يا القلــــب
يَا الْقَلْبْ تْكَابَدْ لَهْمُومْ ذَابْ جَهْدِي مَنْ حَمْلِي..
نَارْ تَضْرَمْ فِي جُوفْ ادْخَالِي * لَهْبَتْ شُعْلَة..
ألْعْدَاوَة صَنْعَةْ لَرْذَالْ صَنْفْ مَنْ شُغْلْ الْعُكْلِي..
حِينْ يَشْــرُبْ عْصِيـــرْ دْوَالِي * صُوتُه يَعْلِى..
حَالْ جَاهَـلْ تْفَــرْظَـمْ مَنْ عْمَاهْ مَا رَادْ يْــوَلِّي..
ألظّْــــلَامْ يْسَـــاوِي لَعْضَـــالْي * تَكْثَـرْ لَوْ لَا..
ألزّْعَامَة وَالْكَلْمَة سَايْبِينْ فِي وَسْعْ الْمَطْلِي..
تَنْحْجَبْ فِي حَزَّةْ لَمْشَالِي * مَا مَنْ خَصْلَة..
يَا الْقَلْبْ اسْتَعْصَمْ بَالله زَدْتْ حَمْلْ عْلَى حَمْلْي
عِيلْ صَبْرِي مَنْ عُمْقْ اهْوَالِي * سْبَابْ الْعَلَّة..
لَاشْ خَيْرِي نَتْصَوَّطْ بِيهْ مَالْ حَالِي وَ السَّفْلِي..
بَعْـدْ نَكْسِي وَ رْشَاوْا حْبَالِي * وَ الْخَيْطْ بْلَى..
زَادْ ذَهْلِي خَبّــَلْ غَــزْلِي وْ كَادْ تَشْتِيتْ لْشَمْلِي
لُــو الْعَالِي مَا شَـافْ لْحَالِي * عْمَــارَة تَخْلَى
نَسْتْهَلْ اللِّيعَة مَن اللِّي كْـرَمْتْ زَاهِي مَتْسَلِّي
نَالْ حَظُّـه فِي سَهْــوَةْ حَالِي * وَقْــتْ الْغَفْلَـة
يَا الــدُّنْيَا ضَحَّكْتِـي نَـاسْ حِيـنْ بَكِّيتِـي نَجْلِي
جَايْـــرَة تَخَّفْضِي لَعْــلَالِي * لَسْفَــــلْ يَعْلَى
يَا الْقَلْبْ اسْتَعْصَمْ بَالله زَدْتْ حَمْلْ عْلَى حَمْلْي
عِيلْ صَبْرِي مَنْ عُمْقْ اهْوَالِي * سْبَابْ الْعَلَّة..
قُلْتْ حَصْرَاهْ عْلَى يَامَاتْ كُنْتْ مَحْضُوضْ بْتَكْلِي..
وِينْ نَغْرَسْ شَطِّي يَسْجَى لِي * وَ الْمُرْ يَحْلَى..
جُلْتْ فِي أرْضْ الله الْبَرْ وَ الْبْحَرْ تَلْ وْ قَبْلِي..
عْـرَفْتْ كَمْ مَنْ رَاجَلْ وَغْـوَالِي * مَنْ كُلْ مَلَّة..
كُنْتْ وَالَعْ كِي نُـوَّارْ الـرّْبِيعْ وَ الصَّحَّة تَبْلِي..
ألْعْــوَانَـسْ وَ الــزَّهْــوْ اشْغَالِي * نْهَــارْ وْ لِيلَـة ..
كُنْتْ نَتْحَـدَّى خُوفِي وَ الْـوْعَارْ بَزْعَامَة نَغْلِي..
مَا نْكَــــلْ مَا يَتْنَــــوَّى بَالِـي * عَـزْ الصُّولَة..
يَا الْقَلْبْ اسْتَعْصَمْ بَالله زَدْتْ حَمْلْ عْلَى حَمْلْي
عِيلْ صَبْرِي مَنْ عُمْقْ اهْوَالِي * سْبَابْ الْعَلَّة..
هْرَمْتْ زَعْمَا وَ ذْبَالَتْ وَرْقْتِي بْلَغْ وَ رْجَحْ عَقْلِي..
نْبَـــذْتْ دُنْيَــا زَالَـــتْ مَنْ بَالِـي * بَـذْنْ الْمُـولَى..
عْـــرَفْتْهَــا بَخَّاسَــــةْ لَعْمَــارْ فَانْيَـة غَـرَّتْ قَبْلِي..
لِيــــسْ حَـالِــي لَــوَّلْ لَا تَالِـي * فْأرْضْ السَّفْلَة..
مَا خْلَــدْ فِيهَــا مَالَـكْ لَا وْزِيــرْ لَا عَـادِي مَثْلِي..
لَا فْقِيــــــهْ تْعَبَّــــــدْ لَا وَالِــــي * حَتَّى الرُّسْلَة..
أللّْبِيـــبْ يْـــوَنِّـي لَلــدَّايْمَــة وْ يَتْفَــادَى جَهْلِـي..
صَانْ عَرْضُه مَنْ صَنْفْ اوْحَالِي * بَدْنْ وْ حُلَّة..
يَا الْقَلْبْ اسْتَعْصَمْ بَالله زَدْتْ حَمْلْ عْلَى حَمْلْي
عِيلْ صَبْرِي مَنْ عُمْقْ اهْوَالِي * سْبَابْ الْعَلَّة..
ألِفْرَاسَة وَهْبَةْ رَبِ الْكْرِيمْ نِعْمْ الْمَتْجَلِّي..
لَلْجْرَاْس وْ قٌطْبَا وَ بْدَالِي * وَ اهْلْ الْحَالَة..
خَلْقْ رَبِي لَعْبَادَةْ الْجْلِيلْ مَأْمُورْ وْ مَبْلِي ..
ألطّْيَارْ تْسَبّْحْ لَلْعَالِي * فْ رَاسْ السَّرْوْلَة..
ألْخْصَايَلْ جَنْحَا يَرْقَاوْا بِيكْ شَامَخْ مْعَلِي..
كَالتّْمَرْ يْدُوَّحْ وِ يْشَالِي * عْرَاجَنْ نَخْلَة..
ألنّْحَلْ يَتْلَايَمْ عْلَى الرّْحِيقْ وَ الْجَبْحْ الْعَسْلِي..
كُلْ طَلْمَسْ بْجَبْحُه خَالِي * مَا لُه غَلَّة..
زَادْ حَمْلِي ثُقْلْ لْثُقْلِي عْلِيلْ وَ تْخَبَّلْ غَزْلِي
دْعَى التهَامِي ذالجَلَالِ * فَكْ الْحَصْلَة
ألْعْلَايَلْ كَثْرَتْ وَ قْوَى الْفْسَادْ مَضْمُونْ وْ شَكْلِي..
ألرّْخِيسْ يْبَوَّرْ الْغَالِي * فْ سُوقْ الْجُمْلَة..
يَا الْقَلْبْ اسْتَعْصَمْ بَالله زَدْتْ حَمْلْ عْلَى حَمْلْي
عِيلْ صَبْرِي مَنْ عُمْقْ اهْوَالِي * سْبَابْ الْعَلَّة..
