ـــــــــ كسّرْ عودكْ
ــــــــــــــــــــــــــــــــــــــــــــــــــــــــــــــ
كسّر عودكْ يا العراقي وأرحلْ
عزفكْ هذا راه حركلي لجراحْ
*
لمن تعْزف قوليّ فيكْ أنسولْ
منهو يسمّع صوت ذ القلب اللي ناح
*
ياكْ الأمَة كلها طاحتْ في الذلْ
وماتنفع للْحان للي ماتْ وراح
*
عزفْ وْتاركْ عاشقَة وقتْ اتْبدلْ
بكري ياحسراه صفحاتو تنْصّاح ْ
*
ملي كانْ العزّ عندكْ يتْجولْ
والكرامة تاجنا دايم وضّاحْ
*
والنخوة كيفاه عند الناس امْثلْ
والجيرَة آمان مستورة بجناحْ
*
وع الشرفْ حتى نسانا ماتثْقلْ
والأُخوة عندنا لمّة وأفراح ْ
*
شوفْ الحال بينا وين وصلْ
والآخْ لآخوهْ ولالو ذبـــــاحْ
*
أغدرْ بيه وشربو كيسان الذلْ
وقطعلو لوصالْ هاهو دمو ساحْ
*
راه النسرْ ليوم خايفْ م لحْجلْ
وحتء السبعْ اليوم لخدودو جرّاحْ
*
من ذالحال إللي علينا راه انزلْ
همو ياسر كي الزلزال أذا طاحْ
*
بيتْ المقدسْ جرحها ينزّف سايلْ
والعراقْ اليوم قا دمو كفّاحْ
*
بيوتْ العزّ آخاوتي طاحتْ ع الكلْ
وتْهجر كم كان في وطمو مرتاحْ
*
والغريبْ في وسطهمْ للنار شْعلْ
نارْ الفـــــــتنة بينهم لازمْ تكساحْ
*
وتْركهم في بعضهم ملْ مع ملْ
إفنوو بعضاتهم هاذ الْجيّاحْ
*
منو يرحم ذي مرا وهذاكْ أطفلْ
والْعفيفة لحْمها عند الســــــفّاح ْ
*
أمـــريكي صهيون بينا راه أفعلْ
وفوق الهم أجراحْ محكوكة بمْلاحْ
*
دجْلَة والفرات ماهم راه اضْحلْ
والنعورة وسطهم يبكي بنّـــــواحْ
*
وجرحْ الغادرْ راه ع النخلْ يكملْ
تمرو يابسْ مايفيـــــــدوشْ التلّقاحْ
*
حتْ التربَة عندكم ليها خلخلْ
لوثْها يحقادْ منها ما ترتاحْ
*
حاقد عنكم راه ظاهر يا راجلْ
وغدر الخاوا مرّْ مليانة لقداحْ
*
آه اعليهم قولها عنهمْ جلجلْ
وذكرهم بلاكْ تتحركْ لرواحْ
*
فكرهم كيفاه عراقكْ لــــوّلْ
كان على الأمة يقاوم دون اسلاحْ
