مَعْذُورْ يَا اهْلِي
مَنْ بَعْدْ مَا هْنَى قَلْبِي وَ تْفَــاجَى الْغْيًـــامْ * وَ تْهَـدّنْ الْبْحَــرْ زَالَتْ الْكُشْـــــرَة
قَدْرِي مْعَ الْقْضَا كَتْبُوا لِي بَلْوَة حْتَـــــــامْ * بْحَرْبَة نْعْطَبْتْ وَ ظِهَرْ سَقْمِي بَــرَّا
ألْــوَعْــدْ صَاقْ قَلْبِي عُــرْضَة بِينْ الرّْيَــامْ * لَلُّوشْ وَ الزّْهَرْ فِي رَوْضَة خَضْـرَا
وَ سْطْ الـرّْيَاضْ وَرْدَة فَاتَـحْ تَّبْـرِي السّْقَــامْ * فَحْفَاحْةْ الْعْطَرْ تَخْطَفْ النَّضْــــــرَة
عَضْرَا مْبَهّْجَة تَتْسَارَى مَثْلْ الْحْمَــــــــــامْ * تَسْبِي قْلِيبْ مَنْ هُـو تَايَــبْ يَقْـــرَا
عَيْنِي شْفَاتْ مَنْ رَشْقَتْ فِي قَلْبِي حْسَـــامْ * يَا رِيتْنِي عْمِيــتْ الْعَيْــنْ بْجَمْـــــرَة
مَعْذُورْ يَا اهْلِي كَفُّوا عَنِّي مَ الْمْــــــــلَامْ * مَلْسُــوعْ بَالْهْــوَى خَايَفْ مَا نَبْـــرَى
ظَبْيَاتْ سَايْحَة فَـرْقْ افْـوَاجْ * قَصْدُوا الْفَرْحْ زَهْوْ وْ فُرْجَة
مَتْــزَيْخِينْ وَ الْخَاطَـرْ هَــاجْ * َو دْمُوعْ تَنْهْمَرْ بَالْبَهْجَة
عَيْنِي شْفَاتْ دَعْجَةْ لَغْنَــــاجْ * خَزْرَاتْ فِي نْجَالْ الْعَلْجَة
مَسْبِي بْزِينْ مُولَاتْ التَّـــــاجْ * ذَاتِي مْلِيّْعَة مَخْتَلْجَــــــــة
بْحَرْهَا سْخُونْ دَافَقْ بَمْـــوَاجْ * يَا دَاخْلُه احْذَرْ لَا مَلْجَــــــا
مَنُّه رْهَبْـتْ مَا صَبْـتْ مْــزَاجْ * خُفْتْ الدّْخُولْ مَا لُه خَرْجَـة
لْسَانِي ضْحَى مْهَلْوَسْ لَجْـلَاجْ * مَفْضُوحْ مَا تْقَنْتْ اللَّهْجَــة
سَلَّمْـتْ مَخْتْلَــجْ لَمَّا نَــزْعَــتْ اللّْثَــــــــــــامْ * بَدْرْ التّْمَامْ زَاهِي لِيلَةْ عَشْـــــــرَة
عَقْلِي مْخَمْرَاتُـــــه مَرْخُوفَـــــةْ الْحْـــــــــزَامْ * مِيرْ الْهْوَى اهْزَمْنِي مَا لِي نُعْرَة
نَشْوَى غْشَاتْ مُخِّي وَ سْكَرْتْ بَلَا مْــــــــدَامْ * مَمْلُوكْ لِيسْ نَصْحَى مَنْ ذَالسَّكْرَة
ذَالزِّينْ مَا رْمَقْتُه بَالْعَيْـــنْ * شَرْقِي وْ غَرْبْ جُوفْ وْ قَبْلَة
سُبْحَانْ مَنْ طْبَعْ الْحَيِيــــــنْ * كُلُّه حْسَانْ فِي ذَالطُّفْلَــة
مَكْمُولْةْ الضّْرَافَة وَ الزِّيــــنْ * هَمَّة وْ شَانْ كَسْبَتْ جَمْلَــــة
سَلْسَة بْصُوتْ دَافِي وَ حْنِيـنْ * تَشْبَاحْهَا دْبَاجْ وْ حُلَّــــــــــة
إذَا قْصَدْتْهَا طُحْتْ مْكِيـــــنْ * وِ اذَا مْشِيتْ مَـتْ بْعَلَّــــــــة
عَقْلِي حْتَارْ بِينْ الْأمْرِيـــــنْ * مَشْلُولْ مَا يْسَلَّـكْ حَصْلَـــة
مَنْ بَعْدْ مَا خْمَدْ نَارْ الْبِيـــنْ * عَيْنِي سْبَابْ قَلْبِي تَبْلَــــى
مَكْوَاكْ صَاهْــرَة يَا عَيْنِي جَفْيْ الْمْنَــــــــامْ * بَدْمُـوعْ هَاطْلَـة مَعْضَمْهَا غَمْـــرَة
مَجْرُوحْ مَنْ خْدُودِي بَالدَّمْعَة كَالْوْشَـــــــامْ * بَكَّاتْ حَالْتِي مَنْ قَلْبُه صَخْــــــــرَة
غَرْقَانْ فِي هْوَى مَنْ فَاقَتْ عْلَى الْوْسَـــــامْ * حَارْ الْفْصِيحْ عَاجَزْ وَصْفْ الْعَضْرَا
مُحَالْ وَصْفْ تَاجْ الْغُـــزْلَانْ * مَا شَــافْ زِينْ مَنْ لَا شَافُــه
شَعْرُه غْرَابْ وَابَدْ لَحْـــــزَانْ * دَعْــبْ الــرّْيَاحْ بِينْ كْتَافُـــه
غُرَّة هْلَالْ (وا حِ) رَمْضَـانْ * مَنْ قَـوْسْ حَاجْبــُه تَقْسَافُـــه
لَثْمَادْ كَالْجْعَـبْ في الْمَيْـــــدَانْ * فَتَّـاكْ في الْـوْغَى بَطْــرَافُــه
الفم كالخويتم حنــــــــــــــان * ثَلْــجْ السّْنَــانْ حَمْــرْ شْفَافُـــه
فَتْحْ الْخْــدُودْ كِي بَنَّعْمَـــــــانْ * وَصْفْ الرّْيَاضْ مَنْ تُوصَافُـه
ألْجِيدْ مَرْمْرِي وَسْطْ جْمَـــانْ * نَهْـــدُه تْفِيفْحَـــة تَصْنَافُــــــه
لَصْبَاعْ كَالْقْلُومَة وَ زْنَادُه كَالسّْهَـــــــــامْ * وَ الْكَــفْ سَابْغَـاتُـه حَنَّـة حَمْــــــــرَة
الْقَدْ سَرْوْلَة وَ لَا طُولَـةْ الْعْــــــــــــــــلَامْ * مَرْوِي الْجَدْعْ وَسْطْ الْجَنَّة خَضْـــرَة
نَفْسِي انْسَالْهَـا مَا طَـاوَعْ فُمِّـي كْـــــــــلَامْ * لْسَانْي نْشَلْ و تْلَهْوَثْ في الْهَــــــدْرَة
مَعْذُورْ يَا اهْلِي كَفُّوا عَنِّي مَ الْمْــــــــلَامْ * مَلْسُــوعْ بَالْهْــوَى خَايَفْ مَا نَبْـــرَى
تْخَلَّصْتْ مَنْ عْقُدْ لْسَــانِي * وْ كَلَّمْتْ عَارْمِي بَالْهَمَّــــــة
رُوفِي عْلَى الْعْشِيقْ يْعَانِي * سَقْمِي دْوَاهْ مَنَّكْ كَلْمَــــــــة
مَنْ بَعْدْ مَا لْقَــحْ جْنَـــانِي * وَ طْيَارْ غَرْدَتْ بَالنَّغْمَـــــــة
وَ غْشَى النُّومْ رَمْشْ عْيَانِي* وَ شْفَافِي بْدَاوْا الْبَسْمَـــــــة
مِيرْ الْهْوَا اقْهَرْ عَيْنَـــانِي * تَرَّاسْ قُومْ دُونْ الرَّحْمَــــــة
خَبْيَاتْ دَقْهَا فَ كْنَانِـــــي * بْجِيشُه احْتَلْ وَ بْنَى خَيْمَــة
مَهْزُومْ مَنْتْكَسْ سُلْطَانِي * وَ عْسَاكْرِي عْجَبْ مَهْزُومَـة
خَـاذْ الْعْقَــلْ مَنِّي وَ رْفَضْ حَــلْ السّْـــلَامْ * مَنْ لَا طْلَبْ جَــزْيَة وَحْكَــمْ لَسْــرَا
مَكْوَاكْ في الْهْمُومْ يَا قَلْبِي وَ قْوَى السّْقَــامْ * ألنَّـاسْ هَـانْيَـة وَ انْتَ فِي حَسْـــرَة
حَـوْلِي وْ قَوْتِي بَالمُقْتَــــــدِرْ بَالـــــــــدّْوَامْ * يَا نَاصْـرْ الضّْعِيفْ عْزِيزْ الْقُـدْرَة
مَعْنَاتْ لِي انْظُنَّكْ هْبِيــــلْ * لُو كَانْ تَسْتْمَرْ فِي ذَالْحَالْ
قَلْبِي لْجِيهْتَكْ لِيسْ يْمِــــــيلْ * مَفْرُوغْ ذَالأمَرْ مَ الْمُوحَالْ
نُوصِيكْ سِيرْ وَ عْجَلْ بَرْحِيلْ * نَاسِي أْصَالْ نَسْوَة وَ رْجَالْ
جَاوَبْتْ عَارْمِي بَالتَّاوِيــــلْ * كُرْمْ الضّْيَافْ شِيمَةْ لَبْطَالْ
أمَّا انْتِ بْقَلْبَكْ كْحِيــــــــــلْ * مَا هَزْ سَاكْنَكْ رِيحْ وْ صَالْ
مَا صُبْتْ وَدّْ فِي غَسْقْ اللِّيلْ * مَسْدُودْ بَابْ قَلْبَكْ بَقْفَــــــالْ
رَدْ الْجْوَابْ ضَيْ الْقَنْدِيــــــلْ * مَنْ بَعْدْ مَا جْرَحْتُه بَاقْوَالْ
مَنْسُوبْ مِينْ نَاسَكْ وَ اهْلَكْ مْعَ الْمْقَــــــامْ * وِاذَا غْـرِيــبْ مَـا سَبَّــةْ الــــزُّورَة
أنَا غْـرِيبْ رَدِّيتْ عْلِيهَا بَالتّْمَــــــــــــــــامْ * وَ هْنَــا رْمَـاوْنِي مَكْتُوبْ وْ قُــدْرَة
حَالِي وْ حَالْ دَاخَلْ صُدْفَة بَحْـرْ الْغْــــرَامْ * أوْ تَـاهْ في الْفْيَـافِي وَ سْـطْ الْقَفْــرَة
قَلْبِي دْفَى بْشَهْلَةْ لَتْمَـــــــــادْ * زَهْوْ الْمْهَاجْ كِي يُومْ الْعِيـــدْ
غْيَامِي نْجْلِى مْفَاجِي لَعْنَــــادْ * زَالْ الشّْتَـــا مْعَــاهْ التَّنْكِيــــدْ
شَمْسِي عْلَاتْ ضَوَّاتْ بْلَادْ * رُوضِي حْيَا لْبَسْ ثُوبْ جْدِيدْ
هَزَارْ صَاحْ زَادْ الْحَــــــــدَّادْ * مَقْنِينْ جَاوْبُه بَالتَّغْرِيـــــــــدْ
مَحْبُوبْتِي عْلَى شَطْ الْــــــوَادْ * مَتْبَخْتْرَة مْسَلِي وَ سْعِيــــــدْ
مَنْ فَرْحْتِي نْرَدَّدْ لَنْشَـــــــادْ * وَ نْغَازْلْ الْبْهَا زِينْ فْرِيــــــدْ
مَا شَافْنِي رْذِيلْ وْ مَحْسَــــادْ * وَ لَا رْقِيبْ مَغْرُورْ جْحِيــدْ
ألْفَجْـرْ حِينْ أَذَّنْ يَقَّضْنِي مَ الْمْنَـــــــــــامْ * صَلِّيتْ حِينْهَا بَالسَّرْ وَ الْجَهْــرَة
سَبَّحْتْ لَلْكْـرِيمْ اسْأًلْتُه مُحْيِي الْعْظَــــــامْ * يَمْحِي زْلَايْلِي وَ ذْنُوبِي كُثْــــرَة
بِجَاهْ صَاحْبْ الْكَوْثَرْ وَ شْفِيـعْ الْأنَــــــــامْ * وَ بْجَاهْ عَايْشَة وَ فْطِيمَة الزَّهْرَة
بِجَاهْ بُـوالْحُسْنِيـنْ عْلِـي نِعْـــمْ الْهْمَـــــــامْ * عُثْمَــانْ بُـوبْكَــرْ كَــذَا عُمَـــــرَ
يَا رَافْــعْ السّْمَــا يَا مُهَيْمَنْ يَا سْـــــــــلَامْ * سَاْلِي نْجَاتْ مَ عْذَابْ الْأخِيـــرَة
بَشِيــرْ وَلْــدْ تهَامِي شَايَــقْ لَلْمْقَـــــــــــامْ * يَرْجَى جْوَابْ رَبِي مَنَّكْ بَشْـرَة
ألنَّفْسْ لَاهْطَــة رَبِي زَيَّنْ لِي الْخْتَـــــــامْ * نَقْوَى عْلَى هْوَا دَنْيَا غَــــدَّارَة
بِينْ السّْمَا وْ بَحْرْ الْمَايَجْ صُغْتْ النّْظَــامْ * فِي عَامْ (فَا ) تْمَمْتُه فَالْبَاخِــــرَة
وَ سْلَامْ رَبْنَا بَالنَّسْـرِي فَتْحْ الْكْمَــــــــــامْ * بَالْفُلْ وَ الْقْرُنْفُلْ وَرْدْ وْ زَهْرَة
لَأهْلْ الَشْــرَافْ وَالدُّهَاتْ اسْيَادِي الْكْـرَامْ * وَ الْوَالْعِينْ وَ كْبَارْ الشُّعَــــارَا
