بعد أن قرأت رائعة الاستاذ بريقل اسماعيل الذي فاجأنا بقياس لكم هده القصيدة الشاعر شوقي ابن الزيبان

بعد أن قرأت رائعة الاستاذ بريقل اسماعيل الذي فاجأنا بقياس

 لم نألفه ولم نعرفه في منطقتنا وتناقشت معه في أدق تفاصيل

 هذا الوزن الذي رد به على الاستاذ عمر الزيعر قررت ان اخوضه مع هؤلاء الكبار

........... .خاني الزهر ...........

شُوفْ ڜَعْرِي وَ قْرَاهْ تْصِيبْ ذَ لْخْبَرْ## إِيهْ يَا.عْمَرْ ## فِي بْيَاتِي تَلْڨَى مَرَاتْ بَادْلِيلْ
وَسْمْحَ الْقَنْدُوزَكْ لَا جَادْ بَالْقْلِيلْ
فِي شْعَارِي مَنْحُوتْ كْلَامْ بَلْعْبَرْ ## زَايْدْ الْنظَرْ ## خَيْطْ غَزْلِي فِي قَوْلِي فَاتْلُو فْتِيلْ
فِي قْوَالِي نَحْكِي عَنْ خَيْبْة لْعْمُرْ ## خَانِي الزْهَرْ ## مَا عْطَانِي زَهْرِي نَا كَانْ لِي بْخِيلْ
زَادْ كَوَّى ڨَلْبِي مَنْ فُوڨْ نَارْ حَرْ ## إِيهْ يَاعْمَرْ ## ذْاكْ حَالِي رَانِي وَلَّيْتْ كَ لْهْبِيلْ
رَايْ دَنْيَا شَڨْلَابَة حَالْهَا مْعُرْ## زَايْدَا تْغُرْ## وَيْحْ مَنْ جَابَاتُو فَشْبَاكْهَا ذْلِيلْ
دَايْرَة دَوَّارَة وِيدَانْهَا تْجْر## حُلْوْهَا بْمُرْ## دَايْمَنْ غَدَّارَا تَرْمِيكْ يَا جْهِيلْ
خَانْ فَكْرِي عَقْلِي وَتْعَاكْسُو كْثَرْ## شُوفْ يَا عْمَرْ ## كَيفْ زَوْجْ ذْيَابَا وَتْعَارْكُو بْلِيلْ
بَيْنْ مَعْرُ وْمَدْحَ اخْصَامَاتْ يَاحْلَيْلْ
فَي.عْيُونْ الْلَوَّلْ جَمْرَاتْ مَنْ شْرَرْ## لَوْنْهَا حْمَرْ ## خَافْ ڨَلْبِي كِي عَلّىّ صَوتْ فِي عْوَاهْ مَالْڨِيتَشْ مَنُّو لاَوَيْنْ بالمْفَرْ ## آه يَا عْمَرْ ## رَاهْ ڨَرَّبْ لَيَّا وَتْسَارْعُو خْطَاهْ
شُوفْ لَيَّا أعْزَلْ فِي ڨَلْبْ ذَ لْخْطَرْ ## وَيْنْ لاَمْفَرْ ## كِيفْ نَعْمَلْ ڨُلِّي مَلْڨِيتْلُوشْ بَاهْ
ذِيبْ فَكْرِي شَطَّنِّي زَادْنِي سْهَرْ ## ڨُولْ يَا عْمَرْ ## حَارْمَة عَيْنِيَّا لَنَّوْمْ لاَتْرَاهْ
ذَيبْ عَقْلِي وَاڨَفْلِي طُولْ فَالْظْهَرْ ## دَارْهَا مْكَرْ ## كَيفْ يَهْنَى مَنْ جَا خَدَّاعْ فِي ڨْفاهْ
يَاعْمَرْ جَاوَبْنِي خُفْ هَاتْلِي خْبَرْ ## بُوحْ لِي بْسَرْ ## هَاكْ نَظْمِي فَسَّرْلِي ڨُولْ لِي عْلاَهْ
حَاسْ رُوحِي مَرْمِي فِي ڨَاعْ ذَ صْقَرْ ## عَادْ لِي مْقَرْ ## حَالْة الْمَسْجُونْ لِّي طَالْ فِي قْضَاهْ شَارْدَة رُوحِي مَنِّي حَابَّة تْفُرْ ## آهْ يَاعْمَرْ ## حَابَّة تُخْرُجْ كِيمَا سَيفْ مَنْ جْوَاهْ
هَارْبَة مَنْ كُبْرِي لَيَّامْ فَالْصْغُرْ## وَاهْ يَا عْمَرْ ## كِيفْ يَرْجَعْ عُمْرِي وِيْعُودْ مَنْ بْدَاهْ
مِينْ لَيَّاهَاذَاالضُر ْمِينْ لِيْ دْوَاهْ
شَاشْ فَكْرِي ڨـُلي مَا طـُڨْتْشَ لْحْظَرْ ## غَابْ ذَالصّْبَرْ ## كِيفْ نَعْمَلْ وَ الْخَاطَرْ شَاشْ مَنْ ڨْبِيلْ
فِي.عْمَاقْ مْدِينَة نَا حَاسْهَا قْفَرْ ## لاَبْ ذَ لْوْتَرْ ## رَاهْ ڨَلْبِي شَوَّقْ لَزَّابْ يَا خَلِيلْ
حَابْ ڨَلْبِي يُغْدَالُو طَارٔ لِيهْ فَرْ ## شَاڨْ الصْدَرْ ## شُوفْ رَاهُو فَرْفَرْ بَجْنَاحْ كِيْ وْعَيلْ
رَاهْ فَكْرِي لَصَّحْرَى شَاقْ يَا عْمَرْ ## وَاحْشَ لْوْكَرْ ## خَايْفُو لاَ يَضْحَى فِي غُرْبْتُو قْتِيلْ
لَوْنْ تَدْرِي بَحْيَاتِي وَقْتْهَا صْغُرْ ## كَانْ يَا عْمَرْ## كِانْ صُغْرِي مَابَيْنْ رْمَالْهَا جْمِيلْ
كَانْ فِينَا الْمَرْحُولْ ڨْوَافْلُو تْخَرْ ## دَايْمَ السْفَرْ ## رَاحْلِينْ نْعَشُّو فَمْوَاطْنْ لْڨِدِيلْ
رَافْدِينْ جْحَافْ الْخَودَاتْ يَا عْمَرْ ## مَالْ يَنْحْدَرْ## رَاهْ ڨَلْبِي شَوَّرْ مَڨْوَاهْ ذَ لْعْلِيلْ
حَابْ نَرْجَعْ نُسْكُنْ فِي بَيتْ مَنْ شْعَرْ## إِيهْ يَا عْمَرْ## فَاطْ مَنْ لَمْدِينَة وَزْعَاقْهَا عْوِّيلْ
يَالِّي تَارَكْ صَحْرَى قَاصْدْ لْحْظَرْ ## لِيكْ ذَلْخْبَرْ## رَاك ْيَومْ تـْنَدَّمْ وَتْعُودْ لِي ذْلِيلْ
حِينْ تُسْكُنْ فِي دَارْ تْشَابْهْ لْڨْبَرْ## ضِيڨْ وَ لْحْصَرْ## مَاتْصِيبَشْ رَاحَة تَشْدَاقْ لَلْعْطِيل
رَاكْ تَعْرَف تَوْعَىْ بَخْسَارْةَ لْعْمُرْ ## ضَاعْ يَا عْمَرْ ## مَايْفِيدَكْ تَنْدَمْ مَڨْوَاكْ يَاحْلِيلْ
يَاالسَّامَعْ لَيَّا بَالاَكْ تَنْغْدَرْ ## يَاكْ يَا عْمَرْ## دِيرْ لِيهَا كُلَّ حْسَابَاتْ لاَتْمِيلْ
يَاڨْنَيدَزْ لاَ تَنْطَحْ وَادْ جَابْ سَيْلْ
فاَنْيَا ذَالْدَنْيَا وَخْتَامْهَا ڨْبَرْ ## لاَيْكُونْ شَرْ ## يَالْمَوْلَى وَرْحَمْنَا سَاعْةَ الْرْحِيلْ

..................
شوقي ابن الزيبان 20/09/2016