بين عاقل والي مهبول عقلي متكدر ـــــ الشاعر حجو كمال ولايت تيسمسيلت

ـــ الشاعر : حجو كمال ولاية تيسمسيلت ـــ
بين عاقل و اللي مهبول عقلي مـــتودر + بين صاحي و اللي سكران تلقاني ثما
ما عصيتش ربي كي ناس جهلو بالياسر + ما قبضتش ديني نيشان هامل في زحمة
لا تسول خايف نعديك بــــجوابي تنضر + تركبك ذ الحيرة و تضيع في بحر بلا ما
حالتي يا سايل نوريك كي حـال الدزاير + باش تفهم محال تصيب حاجة مفهومة
لا تسول يكفي مانيش عالهـدرة قـــادر + شتا نفسر في لغز كبير و مسايل ضخمة
بعـد عـرفي للدنيــا راه فكري متــوخر + سبتي يا سايل خصلات فيا مشتومـة
قعدت في نفسي غير نسال نطرح و نفسر + جاوبتني و عرفت عيوب فيا ملمومة
لـولا من عيبي مانـيش حيــلي متــكبــر + الخير عندي و النية حق و العادة حشمة
عرفت عيبي يا سايل قلب عندي ما ينكر + عرفت عيبي ما نرضى كره للناس و تهمة
ما تجيني في البال نبيع عرضي و نتاجر+ عرفت عيبي كي شفت الناس باعت الهمة
عرفت عيبي و السبة جيت للدنيا شاعر+عرفت عيبي كي صبت العيب صبحتلو قيمة
عرفت عيبي كي قلت كلام وافي ومعبر + عرفت عيبي ماني كي ناس ماتعرف كلمة
عرفت عيبي و عرف صدام عيبو و انتحر + وينحسد في موتو من مات موتة بزعامة
عرفت عيبي عربي مازال كي بويا و اسمر + سيرتك يا جدي خلات في قلبي وشمة
سيرتـك يا عقـبة ولــيت بهـا نتعــاير + و عند ناسي ضركة ولات تهمة و حشومة
ناس ضروك يا سايل ناس مخلوقــة للـشر + اللي تفتش قلبو تلقاه من داخل فحمة
اللي تظـنو جــنة تلقاه جهــنم تـزهــر + تقول موسى يخرج فرعون مكانش رحمة
ضميرها ذ الامة كي ضاع و النيف تكسر + ريح غربي بعثر تاريخ عز و كرامة
شتا تلمي و انت حفيان و الشوك مـسمر + كي الجاري مورا لوهام يقبض في غيمة
عاقرة يا أمة كيفاش ما جـبتي شاطر + علاه بكري طارق جبتيه من خالد وحمة
تكرمي ذ المرة بلاك تولدي حيدر + كل مرة لشفاف تموت و تضيع البسمة
توحمي على رعدة وغيوم بالحجرة و امطر+لحني من صوت البارود و المدفع نغمة
توحمي على ثورة في قلب شاعرمستعمر+حبيبتو في العراق ضحات للطامع سهمة
تعلمي كيف تجيبي ناس على النيف تناقر+توحمي على خيمةشيبان بالجود وحكمة
توحمي على قبايل وعروش وسيوف لمنذر+شكون سلك بنت النعمان من طاغي وعمى
هكذاك يا أمة مازال تاريخك يهدر + و كي نعاود حاضر لولاد غدوة يا أمة
هكذاك يا سايل مازالت باهبالي نهدر+ بين عيبي و حروف الشعر راني نترامى
ناس تبغي تالي لشعار و قصيدة في الخر + و حين بحت بعيبي خرجت كلمة محتومة
قصيدتي ماهيشي من ثلج بارد مقمر + شتا يدير البارد ماعاد في وذني يحما
قصيدتي ماهيشي للمدح ماتعرف تشكر+قصيدتي ماهي عظمة كلب ماني كي هوما
قصيدتي مولودة من نار بركان تفجر + قصيدتي من حبي للناس خرجت لوامة
قصيدتي من غضب الفرات مولودة تهدر + قصيدتي من دمع العراق ولات رمامة
قصيدي يا سايل للناس تنهي و تآمر + غير نهدر كلمة نتلام و تعود قديمة
هكذاك أسايل مازلت في حالي حاير + بين عاقل و اللي مهبول تلقاني ثمة
حالتي سميها كي بغيت و انتايا خير + و غير شد سوالك لا تزيد للخاطر غمة
ما يداوي همي من غير فجاي الخاطر + بيه نقدر نفك رموز دنيتنا ظلمة
+/ انتهى +/