هذه القصيدة المتواضعة ردَّ التحية عليه ـــــ الشيخ الزيعر اعمر

الجُودْ مْنَ الجُودْ وَالجَوْدَة مَفْصَلْ
وَالجِــيَّدْ للجُودْ يَتْسَمَّى مُرْكَـاحْ
الفَضْلْ إذا حَـــطْ يَخْــتَارْ المَنْــــزَلْ
وَالبُخْلْ بْـ طَبْعُو يْحُطْ عْلى الجــِيَّاحْ
والطِيبَة مَ الطِيبْ مَاهِي مَنْ حَنْظَلْ
وَالمُرَّة مَ المُــرْ مَا هِي مَنْ لَجْــبَاحْ
الدُنْيَا ذَا حَــــــالْهَا يَا مَنْ تَسْــــــألْ
بَــذْرَة مَنْ صِـلينْ و بنَادَمْ لَــــــقَّاحْ
نَخْلَة عَـالي جـْــرِيْدْهَا لَلْبُــعْدْ يـْطُلْ
فِـيهَا مَا لا رَاتْ عَـيْنِي يَا فُصَّاحْ
إذا جِيتْ لْطِــــــــــــيْبْهَا مَا يَتْمَثـَّـلْ
ويـْذا جِيْتْ لْمُـــــرْهَا يَمْلِي الأقْـدَاحْ
إذا جِيتْ لْبَـــرْهَا سَــهْبِي مَرْمَلْ
وِيـذا جيتْ لْلَــــــوْنْهَا دِيْمَة وَضَّاحْ
إذا جيت لسَـــــــاسْها سَاكنْ لَسْفلْ
وِيـْذا جِيْتْ لْرَاسْــــــهَا عَالِي دَوَّاحْ
الجُودْ إلاَّ جُــود لَرْبَاعْ أهلْ الفضْلْ
في ذَا النَخْلَة نَـــنْعْتُوهُمْ للشُـــرَّاحْ
نَاسْ الغِـيرة والشْنَى عُشَّاقْ البَــلْ
يُومْ النَدْهَة يَنْبْشُوا خَـيلْ التَجْراحْ
جَـــوَّالة وَ ايَّـــــامْهُمْ كُــلْ مْحَافَــلْ
مَثلْ طْيُــــورْ يْــبَيحُوا في كُل مْـرَاحْ
مَقْصُودِي لَغْـوَاطْ يَا رَبِّي سَــــهَّلْ
هذا النَــوْبَة خَـاطْري لَعْــرَبْهَا لاَحْ
ابْرَاهـــيمْ شْعَــــيبْ مَقـْصدْنَا الأولْ
حَجْ وْ حَـاجَة في مْلاقَاتْ المُصْبَاحْ
جَـيَّدْ جُـودُوا زَارْنِي قـَبْلَنْ نَوْصَلْ
وَقْتْ الشَدَّة ﭭـالْ لي يَا مَرْوْ ارْوَاحْ
إذا عَـنْدَكْ صَـاعْبَة كـُــــلَّشْ يَسْهَلْ
بإذن الله من بَلْسْـمِي تَـبْرَى لجْرَاحْ
ﭭلْتْ انْـــرُدْ جْميلْ مَنْ عَـــنَّا جَمَّــلْ
وَجْميلْ إبْرَاهيمْ يَبْقَى مَثلْ كْلاحْ
فُوﭪ الرَاسْ مْكـَــانْتُو مَا تَتْبَــــــدَّلْ
والدَارْ اللي زَارْهَا تَسْــــعَدْ بَفْـرَاحْ
يَا مَنْ رَيتْ شْـعَيْبْ حَـيِّيْهْ وْ فَـوَّلْ
لَونْ الخَـيْرْ يْبَـانْ مَنْ خَطْفَة لَلْمَـاحْ
أمَّا الثَانِي حَــطْني في رُتْـبَة فَحْــلْ
مَنْصَبْ عَالِي وْمَا لْقَـيْنَا لِـيهْ سْرَاحْ
يَا مَنْ طُـولْ العَــامْ مِيْـــزَانَكْ ثَـاقَلْ
رَاه حْــديثَكْ هَـــلَّكْ عْــــلِيَّا لَرْيَاحْ
بْنْ السَايَحْ سَاﭪ مَ الصَحْرَة للتلْ
نَعْتْ اغْمَامْ عْلَى تْيَارَتْ حَطْ جْنـَـاحْ
زَارْالـﭭـلْتَة وْجَا مْعَ المَرْتْ مْسَهَّلْ
وَادْ الليَّة حَمْلُوا في شَـاوْ صْبَاحْ
عَنْدْ مْرَاحِي حَطْ سَاعَة وَسْتَعْـدَلْ
وَتْـﭭـفَّضْ حَتَى نْ تَاﭪ عْلَى لَلْوَاحْ
لِيكْ الفَضْلْ أنْتَ اللي جُـــدْتْ الأولْ
جُودْ الغَيثْ عْلى الثْرَى وَعْلَى الفَلاحْ
يَسْعَى بالحـَـسْنة اللي بيها يَعْجَـــلْ
والنَاسْ اللي جْـفَاوْهَا رَاحُـو ﭭـُمَّاحْ
أمَّا الثَـــالَثْ رُحْتْلُو وَانَـا ثَــــــامَلْ
عَنْدْ المَلْقَى وَدْني بَكْــيُـوسْ الرَاحْ
الشَاعَرْ جَلُّولْ شُوشَة عَزْ النَجْــلْ
يَشْبَهْ ﭭمْري بَاتْ بَـ هْدِيْـلُوا صَـدَّاحْ
زَينْ النَـبْرَة وَ البْهَاء وَثـْبَة وَعْــقَلْ
زَيـْـلَفْنِي في سَاعْةَ نْ نَــبَّشْ لَقْرَاحْ
هذي هِيَّ بْــرَيْتي يَا رَايَـحْ طُـــــــلْ
طُلْ عْلَى نَــاسْ المْدينَة و السِيَّــاحْ
سَالْ عْلَى لَحْبَابْ كِي مَا كَـــانُو كُـلْ
لا تَنْسَالي حَــدْ مَنْ نَاسْ الطَحْطَاحْ
ﭭولَلْهُمْ شَــاعْرِ الهْوَى رَاهْ اسْتَـمْثَلْ
حين اسْمَعْ أمْـرْ المْحَبَّة لَــيهَا رَاحْ
نَخــْتَمْ بَصْــلاة النْبي طَــــه المرسَلْ
محمد كَـــــامَلْ الضْيَاء نُورْ الفَتَّاحْ
زَيْعَرْ عُمَرْ / بَنْ عَلالْ