----- ما نهجي ----
شاعرة:ربيعة الزيات
ما نهجي حد هدي غير بيات
على لي مغرور قبيح حاس بجنابو
من عمات لو بصيرة كثير فزلات
وعلى اللي بعدو حسن لنا من قرابو
وعلى من جهلو ضليع فيه سكنات
و للشر مع الخديعة فاتح بوابو
حيث غشمي راضع حليب لغشمات
كان حسابه بجهلو بحالو يتهابو
دبا يحصل ف يد زمانو شي حصلات
تنسيه نفسو الماكرة اهلو و حبابو
فبحر لمحاين تغرق روحو فالظلمات
غريب مايحن عليه ولا يعقلوه صحابو
اتلات العدة يا خيي فيد الهربات
الرجال الشداد فين اليوم يتصابو
ماكر خبث قالوها على لي بهات
نار الشر باللوان شاعلة فجنابو
ما سعد بالكلام المرصع و لا بسمات
و لا جلسات مريحاه مابين حبابو
فالضغينة و المكر حياتو راه فنات
دازت ايامو مكدرة الهم زاد عذابو
غري داير ميكة و ذنو ما سمعات
خطاه الصواب غاب عقلو و جوابو
ما خاف الله نفسو لخبيثة ما حشمات
نسا يوم ملقاه معاه ما داير حسابو
نهار تبكي عينو بدموع صبات
سايلة جمر على خذوذو و هذابو
بالذنوب لعظيمة عمر الصفحات
خطايا كبيرة ثقلات وراق كتابو
هذي غير حروف بارية جابتها لوقات
من نسج خيالي و حروفي ما يتعابو
قالت جوهرة مكنية ببنت الزيات
ربيعة البها و الزهر مفتح بجنابو
بنت الحمرا بالسرور مفرشة بهجات
بين أحضان أولياء سكنت ترابو
يا من تسال على لمعاني عندنا حكمات
كيف الجوهر في عقد كثروا طلابو
الجواد يجود بالوفا اسيدي بعطيات
خبر بيها من حضرو و حتى من غابو
نصلي و نكثر على نبينا من الصلوات
نسلم عليه و نبارك لاهلو و صحابو
و سلامي لكل عارف علمني حكمات
سماهم الله بشيوخي عن بالي ما غابو
..... بقلمي ربيعة الزيات