يوم الجمعة راح طيري
للشيخ العربي المكناسي
خمــــــاسة
يوم الجمعة راح طيري وحكم لعلالي
فدفد ورخا جناوحه أرسلته غير يهوم
معه بعت سلامي
للوجيبة لآلة هشوم
بيت
غيّب عني وطاش عقلي وشطن لي بالي
نهار السبت قلت راه يولي معلوم
سومه عني غالي
بت نقارع نجوم
بيت
نهار الحد قلت له وينك يا شملا لي
خليتي لرسام وينك بقتي محكوم
غيرك ما يزهالي
من فراقك رني كا نصوم
بيت
نهار لثنين في صباح بان خيال قبالي
فرحت وقلت يا ودي راه طيري محزوم
نظرت القفصه يا مالي
وقلت آ رأسي كاتنوم
بيت
نهار الثلاثة طلعت له لذاك البرج العالي
سرحت عيني مع الدشور والطريق المخدوم
واحد تما لغى لي
قال لي طيرك تايحوم
بيت
من الصحراء الواد نون صاب الوكر الخالي
نهار الأربعة آ سيدي بانو زوج علوم
ثم الخيل تشالي
هذاك مرسم من الرسوم
بيت
نزل تما وبدا يغني بصوت حنالي
وسمع تولويل جاوبه بصوت المنغوم
قال له جيت آ لغزالي
رقاص لآلة هشوم
بيت
هاكي اكتبي وجاوبيه لي نغدا في حالي
نهار الخميس آ سيدي ولا لي مضيوم
جاب خط القاضي شملا لي
محبة اليوم ما تدوم
بيت
خرجت نحوّس على فقيه يجمع لي لشكالي
قال لي فاني بالهوى من قلبك مسقوم
ما تأكل شي ليالي
قلت له سلمت في أغروم 1
بيت
قال لي عربي أو شلحي وإلا فيلالي
عندك النفس قوية وكلامك محتوم
جمعتي كل لعلالي
روحت منسوب أكسوم 2
بيت
خرجت قدامه تانشوف من يشفي لعلالي
لقيت طبيب قال لي من جوفك مطعموم
قلت له قوت ما يحلا لي
إلا البصلة مع الثوم
بيت
من لا شاف ما شفى يبقى فالصف التالي
مثل اليتيم كبر في القفرا محكوم
يشرب من خمر دوالي
ويحسب الأيام بالقلوم
بيت
من لا جال ما ركب ما تبع فرڨ غزالي
كا مثل الداب ركب بالجامه ملجوم
تركب ويطيح في الخالي
خصك علفه كل يوم
بيت
من البهجة للرباط مع فاس البالي
سرنا في يوم آ سيدي صبحنا ثم يوم
ثم المسك غوالي
تما العقود والرسوم
بيت
ريح ﺍلقبلي ما نحبه نعوم في المالي
نبغي نشوف من البعد الزين المشموم
نشوف السالف كحالي
وصافه عندي بالتموم
بيت
الخد حمر بلا حمورة من كون العالي
والخال غلام عتنونه مرقوم
والريق فايق لمصالي
والمبسم بحكايمه حكوم
بيت
القد علام أو راية الساق فه خلخالي
محزم بحزام آ سيدي تحزيمة ذا لقوم
حزام حرير وفالي
وحناني بالزواق في لقدوم
بيت
من لا لبس جديد لاش يعاند بالبالي
هذه الدنيا كلها عنده فها سوم
واحد صدره بالذهب قفالي
وواحد قفا ليه الكل دوم
بيت
الله يهدي ما خلق يا غفل شوف قبالي
هذه الدنيا فانية لا تبقى مغروم
الغني و الزوالي
القبر يجمعهم بالتموم
بيت
سيدي ربي يا العالي فكاك وحالي
طولت في الغربة يا ربي وحصلت من القرجوم
لا حد حبيب بقى لي
العرش تشتت لا الموم
بيت
تعزل ولد الحلال المرابط والبوهالي
ومول النية البالغة موكول ومذموم
مثل الجنان الخالي
تأكل وتنكر يا مشوم
بيت
شيخ عرضني صباح نص النهار خلالي
بقيت تما تا نعيّن من حر الشوم
ضوء الله ما يطفالي
والحقار يموت في ظلوم
بيت
شويّخ في ساعته تشيّخ وحسب رأسه آلي
وشاع خبره بالكذوب عند الناس غشوم
في الملحون ما يقوالي
جاب معاني بلا تموم
بيت
سول وسقسي وسال ناس الغرب الجوالي
سمعوا فنه وقالوا هذا مشي مزموم
يزقي بالصوت العالي
في أنغامه ما عنده نغوم
بيت
المدح راه صعيب يا مداح الجيلالي
والي يمدح على النبي ولسانه مغموم
طالب راه أمسى لي
روح قراء العربية بالتموم
بيت
كنت بعقلي زمان الساع حسبني بوهالي
وقال هذا انصرفوا به رني محشوم
محبته ما تحلا لي
راه القلب العالم العلوم
بيت
علمته ميزان رمل الماية وصبح ذو مالي
وبدا يبرح تايفهم وصبح مفهوم
تابع قول المحالي
راه بالدين ما قام شي قيوم
بيت
بالسانه عنده ما حكا قال للقوم أصغى لي
لكن تمر مدت في الصغر عرفوني ناس قدوم
كبير وصغير حكا لي
اسمع السر الغم الغموم
بيت
براح مشى له بغل راح عليه يوالي
وبدا يبرح فالمدون تبريح المفهوم
قال من نهار مشى لي
غرسته حلو رجع لي زقوم
بيت
فوّت ساعة في زمان راك أنت مسالي
في الأخيرة تخلص باش أنت ملزوم
يا وكال عرق الرجالي
راك في زهو الدنيا ما تدوم
بيت
حصلت قي ذا اليوم وزمان رديت منه بالي
الضحكة عنده مبسمة وقلبه مسموم
يبقى فك يخالي
يقضي صلاحه يرميك فالتخوم
بيت
ضربته ضربة ما يقوم وقال لا فراش حلالي
وبقى تما تا يخمم وصبح متخوم
ألي رجل خصالي
يتسلى في الهم تايعوم
بيت
خذ آ راوي قماش مني جبته بروالي
البس ثوبك لا تشير عني بكموم
ألي في المحنة متبالي
لاش بالسانه تا يلوم
بيت
نظم ذا القول يا الفاهم أصغى لقوالي
الرحمان الله والشفاعة قال المعصوم
محمد زهوت بالي
شفيعنا في يوم القيوم
بيت
الحاج العربي ما خفا رجل جوالي
جال فالدنيا وسمع آ سيدي من العلوم
خذا من أفواه الرجالي
سبحان الله القيوم
بيت
ستين رهي في صدري وقريت عن فيلالي
لكن الفن سمعته في ارض المشموم
مولاي إدريس الوالي
تونس ومصر كل يوم
بيت
ناس المغرب مع الزاير راهم قبالي
في المدينة حارمين وجمعنا ملموم
نطلبوا رب العالي
يكمل قصدنا بالتموم
تمـــــــت و بالخير عمت