قصيدة (الكسوف) قياس (كل نور)
يوم حجبات انوار الشمس فالظهر
حل الكسوف وانطفات الإنارة
وشعلت مع الضحى فتيل فناري
ق1
بديت باسمك يا نعم الواحد الكبر
خالق لعباد والفلاك الدوّارة
يامن رفع السما بغير سواري
والصلاة على الهادي طيّب الدّكر
ايمام المرسلين نبع الطهارة
بعداد الحص والرمل فصحاري
درت جدول وبديت نجول بالبصر
لخرايط جبتهم جبت المسطرة
ونشاهد ما يجد في منظاري
ريت كًمرة رفلات فتوبها احمر
وشعاع الشمس في حجابو يتوارى
ويراقب ما جرا فسبع ذراري
والتريا جابت لخبار بالبطر
والزهرا ما خفاك فهمت ليشارة
وسهيل بدا يروم للمشتري
يوم غربات نوار الشمس فالظهر
حل الكسوف وانطفات الإنارة
وشعلت مع الضحى فتيل فناري
ق2
جات الظلمة بنهار.. والكًمرة فاحمرار
والسبع ذرار احتارو
سهيل مع عشتار.. والزهرة فانبهار
وعطارد ما فخبارو
الزحل الدوار ..والمريخ المشرار
حامل حربة فيسارو
لحت شوفي وسرحت بواسع النظر
شفت المريخ سل سيفو للغارة
وعطارد كيصيــح أنـــــا باري
بعد جا للزُّحَل وقال ليه قرّ
هدا لحساب ما تنفعك حزّارة
صارحني لا يصير دمك جاري
آش كان سباب الحلكة بلا فشر
ذبلات الشمس بعد كانت نوارة
والوقت ظلام قول شنهو طاري
جاوب عطارد بعد لّا لقى صبر
هاد التسوال يا المريخ دسارة
خاب المظنون فيك يا مفتري
شوف لقمر زاهي بكمالتو بدر
من غير اوان جا وعامل شوشرة
ومعمر فالسواق ما هو شاري
يوم غربات نوار الشمس فالظهر
حل الكسوف وانطفات الإنارة
وشعلت مع الضحى فتيل فناري
ق3
المريخ الحكًار..عوال على لكًحار
لا حد يروم جوارو
داير فيها مزوار..ولّا فارس مغوار
زايغ ما شد اوقارو
يتصرف دون شوار..ادا ياخد لقرار
تعما فالحين ابصارو
يا الغشمي قال المريخ للقمر
عايش بالليل فالسهير ولقصارة
لاش حجبتي ليوم ضي نهاري
لا حيا فيك ولا حشمة ولا وقر
غطيتي بالحجوب دارة لمنارة
والضي بهات يا القاصد عاري
طول عمرك لاهي فمجامع السّهر
تابع لهوى ودسروك الشّعارا
وياك تزيغ لا تلفحك ناري
حاوبو لقمر وخلاكًو على البهر
شكون خطا وكلفك بالمدارة
لا تقربني ولاتحوم جواري
يا المريخ انا مخلوق من حجر
وانت غازي تفجرك غير شرارة
خليك بعيد لا تعود اشطاري
لا يغرك حجمك ماجات بالكبر
الأرض اللي تبان قد المزرارة
فيها خير الورى صفي الباري
يوم غربات نوار الشمس فالظهر
حل الكسوف وانطفات الإنارة
وشعلت مع الضحى فتيل فناري
ق4
هاج المريخ وثار..وبدا يلهج بالنار
والكل يخاف شرارو
سماوه فالأثار.. إله الحرب وجار
فرعن ونسى مقدارو
من سخرية لقدار..جا يتعدى المدار
وتبهدل خارج دارو
قال لقمر يا سايلني على القدر
هو بيد الجليل رهن الإشارة
فجميع الكاينات حكمو جاري
ما عصيت الخالق والا نويت شر
نخدم ونطيع مانساعف أمّارة
حكمت ربي ادا تركت مساري
ذاك أمر الواحد من لا خفاه سر
ماليه شريك ما يشاور وزارة
وانت معروف بالفضول حشاري
شوف ماجا فكتوب مناهج البشر
علم الأرصاد والفضا والإشارة
سول يا صاح كل من هو قاري
جل مولانا ربي شامخ القدر
عالم لخفا وما تجلى بجهارة
حكمو وقضاه فالخلايق ساري
واسمي يا منهو ذوّاق فالشعر
توفيق بلا رموز والا ستارة
سلواني فالقريض شاع اخباري
درت فيك يقيني يا غافر الوزر
وصلاة الشافع الورى خير تجارة
علاج كًرايحي وطب اصياري
يوم غربات نوار الشمس فالظهر
حل الكسوف وانطفات الإنارة
وشعلت مع الضحى فتيل فناري
توفيق ابرام ...سلا
